२० चैत , काठमाण्डौ।
पाँच महिनादेखि रोकिएका साधारण शेयर सार्वजनिक निष्काशन (आइपीओ) लाई स्वीकृतिको बाटो खुलेको छ। अर्थमन्त्री बर्षमान पुनको निर्देशनपछि नेपाल धितोपत्र बोर्डलाई आइपीओ स्वीकृतिको बाटो खुलेको हो। अर्थमन्त्री पुनले बोर्डका निमित्त अध्यक्ष तथा कार्यकारी निर्देशक डा. नवराज अधिकारीलाई पाइपलाइनमा रहेका कम्पनीलाई स्वीकृति दिन निर्देशन दिएपछि धितोपत्र बोर्डलाई स्वीकृतिको बाटो खुलेको हो।
बोर्डका निमित्त अध्यक्ष तथा कार्यकारी निर्देशक डा. नवराज अधिकारी अबको केही दिनबाट आवश्यक कागजात पुरा गरेका कम्पनीलाई सन्चालक बोर्डले पास गरेपछी सेयर निष्कासन गर्न दिने बताएका छन् । केही दिनअघी अर्थमन्त्री बर्षमान पुनले आईपीओ निष्कासन प्रकृया अघी बढाउन निर्देशन दिएको र त्यही अनुसार काम अघी बढाएको उनको भनाइ छ ।
अर्को साताबाट आवश्यक प्रकृया अघी बढ्ने उनको भनाइ छ । अर्थमन्त्री पुनले बोर्डको पाइपलाइनमा रहेका कम्पनीलाई स्वीकृति दिन निर्देशन दिएका छन् । अहिले ३५ वटा कम्पनी आईपीओ निष्काशनको प्रकृयामा रहेका छन् । बोर्डको पाइपलाइनमा रहेका अधिकांश कम्पनी जलविद्युत क्षेत्रका रहेका छन् ।
अहिलेलाई मापदण्ड पुरा गरेका अंकित मुल्य प्रति कित्ता एक सय रुपैयाँ भएका कम्पनीहरुलाई आइपीओ निष्काशनको अनुमति दिईने धितोपत्र बोर्ड स्रोतले जनाएको छ। अध्यक्ष नियुक्ति नहुँदासम्मलाई मापदण्ड पुरा गरेका अंकित मुल्य एक सय रुपैयाँ भएकालाई अनुमति दिनेगरि प्रक्रिया अघि बढेको छ ।
आइपीओ निष्काशनको पर्खाईमा २८ अर्ब मुल्य बराबरका ३४ वटा कम्पनी रहेका छन। जसमा पहिलो चरणमा १९ कम्पनीका १६ अर्ब ४५ करोड मूल्यबराबरको नौ करोड ५६ लाख कित्ता सेयर छन। त्यस्तै बोर्डको वितरण प्रक्रियाको अन्तिम चरणमा १६ कम्पनीका ११ अर्ब ४७ करोड ७८ लाख रुपैयाँबराबरको सात करोड ४६ लाख ४७ हजार कित्ता सेयर छन।
जसमा जगदम्बा स्टिलले प्रिमियममा आइपीओ निष्काशनको प्रस्ताव गरेको छ। धितोपत्र बोर्डका तत्कालिन अध्यक्ष रमेश कुमार हमालको गत पुष २२ बाट औपचारिक कार्यकाल सकिनुअगावै शेयर आपूर्ति बढेको भन्दै आइपीओ निष्काशनको कामलाई बोर्डले स्थगित जस्तै गरेको थियो। त्यसयता कायम मुकायमको भरमा चलेको धितोपत्र बोर्डले कुनै पनि कम्पनीलाई आइपीओ निष्काशनको अनुमति दिएको छैन।
