२४ चैत , एजेन्सी ।
दक्षिण कोरियाली टेक्नोलोजी कम्पनी सामसङ इलेक्ट्रोनिक्सको नाफा ९ सय प्रतिशतभन्दा धेरैले बढेको छ । सामसङले जनाएअनुसार सन् २०२४ को पहिलो त्रैमासमा कम्पनीको नाफा ९ सय प्रतिशतभन्दा धेरैले बढेको हो । गत वर्षको पहिलो त्रैमासको तुलनामा यो नाफा १० गुणा बढी हो । सामसङका चिप्सको मूल्य र आर्टिफिसियल इन्टेलिजेन्स (एआई) सम्बन्धित उत्पादनहरूको माग पुनः बढेपछि कम्पनीको नाफामा उछाल आएको हो ।
दक्षिण कोरियली कम्पनी सामसङ मेमोरी चिप, स्मार्टफोन र टेलिभिजनको विश्वको सबैभन्दा ठूलो निर्माता हो । यसैबीच सामसङ इलेक्ट्रोनिक्सले अमेरिकाको टेक्ससमा रहेको चिप निर्माण गर्ने कम्पनीको लगानी ४४ विलियन अमेरिकी डलर पु¥याउने भएको छ । वाल स्ट्रिट जर्नलले जनाएअनुसार सामसङको नयाँ लगानी खासगरी टेलर सहरमा केन्द्रित हुने भएको छ ।
टेलर सहरमा सामसङले अर्धचालक सुविधा निर्माण गरिरहेको तथा सो स्थानमा सामसुङले अब अर्को चिपमेकिंग प्लान्ट र उन्नत ’प्याकेजिङ हब’ निर्माण गर्ने योजना बनाएको जनाइएको छ । यता अमेरिकी सरकारले टेक्ससको टेलर सहरमा व्यवसाय विस्तारका लागि सामसङलाई ६ बिलियन डलर सहयोग गर्ने योजना समेत बनाएको ब्लुमबर्ग न्यूजले यसअघि जनाएको थियो ।
सन् २०२१ मा सामसङले टेलर सहरमा १७ बिलियन डलरको प्रोजेक्ट घोषणा गरेको थियो । यता अमेरिकी बहुराष्ट्रिय प्रविधि कम्पनी एप्पलले छ सयभन्दा बढी कर्मचारी कटौती गरेको छ । यो आइफोनको विशाल जनशक्तिमा महामारीपछिको पहिलो ज्ञात कर्मचारी कटौती हो। क्यालिफोर्नियास्थित यो कम्पनी गत वर्ष कोरोना भाइरस महामारीका क्रममा ठूलो मात्रामा भर्नापछि अमेजन, मेटा, गुगल र अन्य प्राविधिक कम्पनीहरूमा कर्मचारी कटौतीको ठूलो अवस्थाबाट धेरै हदसम्म बचेको थियो ।
डब्ल्युएआरएन भनिने क्यालिफोर्नियाको कर्मचारी समायोजन तथ पुनःप्रशिक्षण अधिसूचना ऐनअनुसार एप्पलले मार्च २७ मा धेरै कार्यालयहरूमा छ सय १४ कर्मचारीलाई नोकरीबाट निकालेको छ । कम्पनीले कर्मचारी कटौतीबारे शुक्रबार कुनै जवाफ दिएको छैन । ब्लुमबर्गका अनुसार नोकरीमा कटौती कम्पनीको विद्युतीय कार बनाउने असफल योजनासँग सम्बन्धित थियो ।
यसबाट एक दशकदेखि भइरहेको सङ्घर्षपूर्ण परियोजना समाप्त भएको छ । आइफोन निर्माताले आफ्नो गोप्य कार विकास कार्यक्रमका लागि करिब दुई हजार कर्मचारीलाई समर्पित गरेको तर उसले बढ्दो विद्युतीय वाहन (इभी) क्षेत्रको सामना गर्नुपरेको ब्लुमबर्गले बताएको छ । एप्पललाई कानुनी रूपमा क्यालिफोर्नियामा मात्र कर्मचारी कटौतीको सूचना दिन आवश्यक भएकाले कर्मचारी कटौतीको दायरा व्यापक हुनसक्छ ।
