७ वैशाख, एजेन्सी ।
इन्डियन प्रिमियर लिग (आईपीएल) क्रिकेटमा मुम्बई इन्डियन्सले पञ्जाब किङग्सलाई ९ रनले हराएको छ । पञ्जाबका आशुतोष शर्माको सानदार ब्याटिङ गर्दै ६१ रन बनाए पनि टोलीको हार टार्न सकेनन् । मुम्बइका सूर्य कुमारले अर्धशतकीय पारी खेले । जितका लागि एक सय ९३ रनको लक्ष्य पछ्याएको पञ्जाब १९ ओभर एक बलमा एक सय ८३ रनमा अलआउट भयो ।
पञ्जाब नाटकीय शैलीमा ९ रनले पराजित भयो । मुम्बइको जितमा सूर्य कुमारले अर्धशतकीय पारी खेले । पञ्जाबले बिर्सनलायक सुरूवात गर्यो। मात्र १४ रन जोड्दा उसले पहिलो क्रमका ४ महत्वपूर्ण खेलाडी गुमाइसकेको थियो । पहिलो चार विकेट जसप्रित बुमराह र जेराल्ड कोएट्जेले चट्काए । उनीहरूले समान २ विकेट लिएपछि पञ्जाब संकटमा पर्यो ।
लगतै हरप्रित सिंह पनि १३ रनमा श्रेयस गोपालद्वारा कट एण्ड बोल्ड भए । सशांक सिंह पनि ४१ रनमा आउट भए । यतिखेर १ सय ११ रनको स्थितिमा पञ्जाबले ७ विकेट गुमाइसकेको थियो । तर यो कठिन स्थितिमा आठौं क्रमका आशुतोष शर्माले अपत्यारिलो प्रदर्शन गरे । उनी क्रिजमा जमे र आक्रमक ब्याटिङका साथ पञ्जाबलाई जिततर्फ डोरयाउन भरपुर कोशिस गरे ।
तर उनी १८औं ओभरको पहिलो बलमा आउट भए । जेराल्ड कोएट्जेले महत्वपूर्ण विकेट लिए । आशुतोषले हरप्रित ब्रारसँग आठौं विकेटको लागि ५७ रनको साझेदारी गरे। यो क्रममा अर्धशतक पनि बनाए । तर यो योगदान जितको लागि प्रयाप्त भएन । हरप्रित ब्रार, जितेश शर्मा ९ रनमा र हर्षल पटेल १ रनमा आउट भएसँगै पञ्जाबले ९ रनको हार बेहोर्यो।
मुम्बईका जसप्रित बुमराह र जेराल्ड कोएट्जेले समान ३ विकेट लिए। त्यसअघि टस जितेर पञ्जाबले पहिले फिल्डिङ रोजेपछि ब्याटिङमा उत्रिएको मुम्बई इण्डियन्सले २० ओभरमा ७ विकेट गुमाउँदै १ सय ९२ रन बनाएको थियो । ओपनर इशान किसन मात्र ८ रनमा कागिसो रबडाको बलमा हरपित ब्रारद्वार क्याच आउट भए ।
पहिलो विकेट सुरूवातमै गुमाउँदा मुम्बईले १८ रन मात्र बनाएको थियो । तर दोस्रो विकेटको लागि रोहित शर्मा र सूर्य कुमार यादवले ८१ रनको साझेदारी गरे। रोहित ३६ रनमा आउट भए । सूर्य कुमारले ७८ रनको पारी खेले । त्यसपछि तिलक बर्मा अविजित ३४ रनमा क्रिजमा रहे। कप्तान हार्दिक पाण्डयाले १० र टिम डेबिटले १४ रन जोडे ।
बलिङमा हर्षल पटेलले सर्वाधिक ३ विकेट लिए । यस्तै साम कुरानले २ र कागिशो रबाडाले १ विकेट आफ्नो नाममा लेखाए । मुम्बईको यो तेस्रो जित हो र ६ अंक सहित सातौं स्थानमा छ। पछिल्लो ३ खेलमा लगातार हार बेहोरेको पञ्जाब ४ अंक सहित नवौं स्थानमा छ। आइपिएलमा आज शुक्रबार लखनउ सुपर जाइन्ट्स र चेन्नई सुपर किंग्सबीच प्रतिस्पर्धा हुनेछ ।
खेल लखनउको घरेलु मैदान ईकाना स्पोर्टस् सिटीमा बेलुकी पौने ८ बजे हुनेछ । लखनउ र चेन्नई दुबैले आफ्नो सातौँ खेल खेल्न लागेका हुन् । चेन्नईले यसअघि खेलिएको ६ मध्ये चार खेलमा जित र दुई खेलमा हारको नतिजा निकालेको छ । चेन्नई आठ अंकसहित तालिकाको तेस्रो स्थानमा आसिन छ ।
यसैगरी लखनउले यसअघि खेलिएको ६ मध्ये तीन खेलमा जित र तीन खेलमा हारको नतिजा निकालेको छ । लखनउ ६ अंकसहित तालिकाको पाँचौँ स्थानमा आसिन छ । इन्डियन प्रिमियर लिगमा हालसम्म लखनउ सुपर जाइन्ट्स र चेन्नई सुपर किङ्सबिच कुल तीन खेल खेलिएको छ । त्यसमध्ये एक खेलमा लखनउ र एक खेलमा चेन्नईले जित हात पारेका छन् । यी दुई टोलीबिचको एक खेल भने अनिर्णित रुपमा सकिएको छ ।
