१२ वैशाख ,काठमाण्डौ।
नेपालको दुई दिने ऐतिहासिक भ्रमण पूरा गरी कतारका राजा शेख तामिम बिल हमाद अल थानी स्वदेश फर्किएका छन् । कतारी राजाको यो भ्रमण नेपालका लागि ऐतिहासिक भएको प्रधानमन्त्री पुष्पकमल दाहाल प्रचण्डले उल्लेख गरेका छन् । राजासँगको द्धिपक्षीय भेटवार्तामा प्रधानमन्त्री पुष्पकमल दाहाल ‘प्रचण्ड’ले नेपाल लगानीका लागि नेपाल विश्वकै आकर्षक गन्तव्य भएको बताएका छन् ।
प्रधानमन्त्री प्रचण्डले कृषि, खानी, ऊर्जा र जलविद्युत्, पूर्वाधार विकास, पर्यटन, सूचना तथा सञ्चार प्रविधि र सेवा तथा सत्कार क्षेत्रहरू वैदेशिक लगानीका लागि उपयुक्त रहेको जानकारी गराए । उनले भने, “नेपालमा शुद्ध पिउने पानीको पर्याप्त श्रोत भएकाले विश्व बजारमा बोतलबन्द पिउने पानी वितरण गर्न सकिने प्रचूर सम्भावना छ ।”
नेपालले लगानीमैत्री वातावरण सुनिश्चित गर्दै लगेको जानकारी दिँदै प्रधानमन्त्री प्रचण्डले छिट्टै नेपालमा हुन लागेको लगानी सम्मेलनमा कतारबाट उच्चस्तरीय प्रतिनिधिमण्डल तथा लगानीकर्ताहरूको टोली नेपाल आउने अपेक्षा रहेको बताए । भौगोलिक विविधताका कारण नेपाल अर्गानिक कृषि उत्पादनका लागि उपयुक्त ठाउँ भएको उल्लेख गर्दै प्रधानमन्त्री प्रचण्डले यस क्षेत्रमा लगानीका लागि कतारी लगानीकर्तालाई प्रोत्साहित गरिने बताए ।
नेपाल विश्व पर्यटनको आकर्षणको केन्द्र रहँदै आएको उल्लेख गर्दै प्रधानमन्त्री प्रचण्डले भने, “नेपालको पर्यटन पूर्वाधारको विकासमा गरेको अन्तर्राष्ट्रिय लगानी खेर जाने छैन ।” प्रधानमन्त्री प्रचण्डले कतार पर्यटन प्राधिकरणको बाह्य पर्यटन गन्तव्यको सूचीमा नेपाललाई समावेश गर्न आग्रह गरे । उनले नेपाल र कतारबीच रहिआएको आपसी सम्बन्धलाई थप सुदृढ तुल्याउँदै दुवै देशको हितमा सहयोग आदानप्रदान हुनुपर्ने पनि सो क्रममा जोड दिए ।
कतारमा कार्यरत नेपालीहरू नेपाल–कतारबीच रहीआएको मैत्रीसम्बन्धलाई अझ सबल बनाउने सूत्र भएको उल्लेख गर्दै प्रधानमन्त्री प्रचण्डले आगामी दिनमा यस्ता सम्बन्धलाई अझ मजबुद बनाउनुपर्नेमा जोड दिए । उनले इजरायल र हमासबीच भएको द्वन्द्वका क्रममा बेपत्ता नेपाली विद्यार्थी विपिन जोशीलाई सुरक्षितरूपमा नेपाल ल्याउन पहल गरिदिन अनुरोध गरे ।
नेपाल र कतारबीच सदैव सौहार्द सम्बन्ध रहँदै आएको उल्लेख गर्दै प्रधानमन्त्री प्रचण्डले दुई देशबीच सम्बन्धहरू सौहार्दपूर्ण मित्रता, आपसी सम्मान, विश्वास र सहयोगमा आधारित रहेको बताए । प्रधानमन्त्री प्रचण्डले कतार सरकारलाई लुम्बिनी तथा पोखराबाट समेत उडान सञ्चालन गर्न आग्रह गरे । द्विपक्षीय वार्ताका क्रममा प्रधानमन्त्री प्रचण्डले काठमाडौँ र दोहाबीच प्रभावकारी एवं पर्याप्त हवाइ यातायात भएको उल्लेख गर्दै त्यस्तो अनुरोध गरेका हुन् ।
प्रधानमन्त्री प्रचण्ड र कतारका अमिरबीचको छलफलमा द्विपक्षीय सहकार्यका विविध आयामबारे छलफल भएको प्रधानमन्त्रीले आफ्नो सामाजिक सञ्जाल ’एक्स’मा उल्लेख गरेका छन्। प्रधानमन्त्रीका अन्तर्राष्ट्रिय मामिला सल्लाहकार रूपक सापकोटाका अनुसार प्रधानमन्त्री प्रचण्डले कतारका अमिरलाई पूर्वाधार, ऊर्जा, शिक्षा र यातायातजस्ता क्षेत्रमा नेपालमा लगानीका लागि अनुरोध गरेका थिए।
त्यसबाहेक उनले नेपालमा हवाई सम्पर्क सञ्जाल विस्तार गरिनुपर्नेमा पनि जोड दिएका थिए। कतारका अमिर अरब देशबाट नेपालको भ्रमण गर्ने पहिलो राष्ट्रप्रमुख हुन्। झन्डै पाँच लाख नेपाली श्रमिक कार्यरत रहेको कतारबाट जलस्रोत, कृषि लगायतका क्षेत्रमा लगानी भित्र्याउने नेपाली अपेक्षा छ। प्रधानमन्त्रीले कतारी श्रमिकसँगको भेटवार्तामा नेपाली श्रमिकका विषयमा पनि छलफल गरेका थिए।
प्रधानमन्त्री प्रचण्डले कतारका अमिरसँगको भेटमा हमास इजरेल युद्धको शान्तिपूर्ण समाधानको पक्षमा नेपाल रहेको धारणा पनि राखेका थिए। त्यसबाहेक उनले हमासले बन्धक बनाएका नेपाली विपिन जोशीको रिहाइको लागि सघाउन अनुरोध गरेका थिए।
