३१ वैशाख , एजेन्सी ।
इन्डियन प्रिमियर लिग (आईपीएल) क्रिकेटमा आज कोलकाता नाईट राइडर्स र गुजरात टाईटन्स खेल्दैछन् । गुजरातको अहमदाबादमा हुने खेल नेपाली समयअनुसार बेलुका पौने ८ बजे शुरु हुनेछ । कोलकाता १२ खेलमा ९ मा जित र ३ मा हार व्यहोरेर १८ अङ्कसहित तालिकाको शीर्ष स्थानमा छ ।
गुजरात १२ खेलमा ५ मा जित र ७ मा हार व्यहोरेर १० अङ्ककासाथ ८ औँ स्थानमा छ । कोलकाताको कप्तानी श्रीयास ऐयर र गुजरातको कप्तानी सुभमन गिलले गर्नेछन् । दुवै टोली यो सिजन पहिलो पटक आमनेसामने हुँदैछन् । कोलकाता यस सिजनको प्लेअफमा पुग्ने पहिलो टोली हो ।
आईपीएलमा भने चौथो पटक कोलकाता र गुजरात भिड्दैछन् । यी दुईबीच अहिलेसम्म ३ खेल भइसकेका छन् । २ मा गुजरात र १ मा कोलकाता विजयी भएको थियो । यसैबीच दिल्ली क्यापिटल्सलाई हराउदै रोयल च्यालेन्जर्स बेंगलुरु (आरसिबि) ले प्लेअफ सम्भावना कायम राखेको छ ।
घरेलु मैदानमा गएराति भएको खेलमा बेंगलुरुले दिल्लीलाई ४७ रनले हराएको हो । बेंगलुरुले दिएको १ सय ८८ रनको लक्ष्य पछ्याएको दिल्लीले १९ ओभर १ बलमा अलआउट हुँदै १ सय ४० रन मात्र बनाउन सक्यो । जित पछि पाँचौँ स्थानमा उक्लिएको बेंगलुरुको १३ खेलमा १२ अङ्क भएको छ ।
समान खेल र समान अङ्क रहेको दिल्ली छैटौँ स्थानमा छ । यस्तै राजस्थान रोयल्सलाई हराएर चेन्नई सुपर किंग्सले पनि प्लेअफ पुग्ने सम्भावना बलियो बनाएको छ । घरेलु मैदानमा हिजो भएको पहिलो खेलमा चेन्नईले राजस्थानलाई ५ विकेटले हराएको हो ।
राजस्थानले दिएको १ सय ४२ रनको लक्ष्य चेन्नईले १० बल बाँकी छँदै ५ विकेट गुमाएर भेटायो । जित पछि एक खेल खेल्न बाँकी रहेको चेन्नई १४ अङ्क सहित तेस्रो स्थानमा छ । राजस्थान १२ खेलमा १६ अङ्क सहित दोस्रो स्थानमा छ ।
