३ असार, विराटनगर ।
नेपालको दोस्रो तथा प्रथम महिला राष्ट्रपति भएपछि नेकपा एमाले त्याग गरेकी पूर्व राष्ट्रपति विद्यादेवी भण्डारी फेरि एमालेमा प्रवेश गरेकी छन् ।
सात वर्ष राष्ट्रपति भएकी भण्डारीले एमालेको पार्टी सदस्यता नवीकरण गरेकी छन् । २०७२ असोजदेखि २०७९ फागुनसम्म राष्ट्रको सर्वोच्च पदमा रहेकी भण्डारीले आफ्नो पूर्ववत पार्टीमा सक्रिय हुने लक्ष्यका साथ पार्टी सदस्यता नवीकरण गरेकी हुन् ।
एमाले पार्टी कार्यालय स्रोतका अनुसार गत वैशाख १ गते नयाँ वर्षको अवसर पारेर संगठन विभाग प्रमुख काशीनाथ अधिकारीले भण्डारीको सदस्यता नवीकरण गरेका हुन् । एमालेको सक्रिय राजनीतिमा फर्कनका लागि पार्टीभित्र वातावरण बनाइरहेकी भण्डारी अब औपचारिक रुपमा एमालेको संगठित सदस्य भएकी छन् । राष्ट्रपति पदमा जानुअघि उनी एमालेको उपाध्यक्ष थिइन् ।
भण्डारीलाई पार्टीको सक्रिय राजनीतिमा फर्काउन एमालेकै केही नेताहरु लागिपरेका छन् । गत जेठ १६ गते एमालेले आयोजना गरेको ‘राष्ट्रिय महिला भेला’को उद्घाटन भण्डारीले गरेकी थिइन् ।
दुई दिन चलेको भेलाको उद्घाटन गर्दा अध्यक्ष केपी ओली अतिथिका रुपमा मात्रै सीमित भए । पार्टी अध्यक्ष नै उपस्थित कार्यक्रममा भण्डारीबाट कार्यक्रमको उद्घाटन भएर ओली ताली बजाउन मात्रै सीमित भएको घटनाले एमालेमा उनको सक्रियताको प्रष्ट संकेत गरेको थियो ।
भण्डारी सक्रिय राजनीतिमा फर्किँदा विघठित नेकपा फर्काउने बृहत् रोडप्याप अघि सारिएको छ । राष्ट्रपति पदमा रहँदासमेत उनले आफू पूर्ववत अवस्थामा आबद्ध रहेको एमाले र त्यसका अध्यक्ष केपी शर्मा ओलीको चाहनाअनुसार पदीय गरिमा बिर्सेर काम गरेको भन्दै पटक–पटक आलोचनामा परेकी थिइन् । सामान्यतया पूर्वराष्ट्राध्यक्ष पार्टीको सदस्य नबन्ने अन्तराष्ट्रिय परम्परा छ ।
अर्का पूर्वराष्ट्रपति रामवरण यादव कांग्रेस पार्टीका औपचारिक कार्यक्रमहरुमा सहभागी हुने गरे पनि पार्टी सदस्यता भने लिएका छैनन् ।
यसैबीच भण्डारी चीन भ्रमणमा जाने पनि बताइएको थियो । तर तत्कालका लागि उनको भ्रमण स्थगित भएको छ । अ
सार महिनाभित्र चीन जाने गरी तयारी अघि बढे पनि भण्डारीको भ्रमण तत्कालका लागि रोकिएको एमाले स्रोतले जानकारी दियो । भण्डारी अध्यक्ष केपी शर्मा ओलीको असहमतिका बाबजुद चीन जाने तय भएको थियो ।
भण्डारीले स्वास्थ्यका कारण तत्काल भ्रमणमा आउन नसक्ने खबर चिनियाँ पक्षलाई दिएकी छन् । उनको भ्रमणलाई सरकार र एमालेले गोप्य राख्ने प्रयास गर्दै आएको छ । चीनले उनलाई पूर्वराष्ट्रपतिको रुपमा भन्दा पनि एमाले नेत्रीका रुपमा स्वागत सत्कार गर्ने तयारी अघि बढाएको थियो ।
नेपालका कम्युनिष्टहरुलाई भण्डारीको नेतृत्वमा एकै ठाउँमा राख्न चिनियाँ पक्षले सुझाव दिँदै आएको बताइन्छ ।
तत्कालीन नेकपामा देखिएको विग्रह र त्यसैको फलस्वरुप पार्टी तीन–चार टुक्रामा विभाजित भएबाट चीन सन्तुष्ट छैन ।
२०७२ मा राष्ट्रपति हुनुअघि एमालेको उपाध्यक्ष रहेकी भण्डारी त्यसपछि पार्टीसँगको औपचारिक सम्बन्धमा थिइनन् । तर, उनले वैशाख १ गते पार्टीको सदस्यता नवीकरण गरेर सक्रिय राजनीतिकमा आउने ढोका खोलिकी हुन् । कतिपयले उनको यो कदम पदीय मर्यादा विपरीत रहेको भनेका छन् ।
