२८ साउन, विराटनगर । दुईदिने भ्रमणका क्रममा नेपाल आएका भारतीय विदेश मन्त्रालयका सचिव विक्रम मिश्रीले काठमाडौंमा प्रधानमन्त्रीदेखि राष्ट्रपति र विभिन्न मन्त्रीहरूसमक्ष भेटघाट गरेका छन् ।
आइतबार नेपाल आएका उनले हिजो दिउँसोतिर नै प्रधानमन्त्री केपी शर्मा ओलीसँग शिष्टाचार भेट गरेका छन् ।
भेटका क्रममा ओलीले नेपाल भ्रमणका लागि भारतीय प्रधानमन्त्री नरेन्द्र मोदीलाई निमन्त्रणा दिएका छन् ।
भारतीय विदेश सचिवसँगको भेटमा दुई पक्षीय र मित्रवत सम्बन्धलाई अझै मजबुत बनाउने बारेमा छलफल भएको छ । भेटमा परराष्ट्र मन्त्रालयका सचिव सेवा लम्साललगायत सहभागी थिइन् ।
यस्तै आइतबारै मिस्रीले राष्ट्रपति रामचन्द्र पौडेलसँग शीतल निवास, कांग्रेस सभापति शेरबहादुर देउवासँग बूढानीलकण्ठ र प्रमुख प्रतिपक्ष दल माओवादी केन्द्रका अध्यक्ष पुष्पकमल दाहालसँग खुमलटारमा छुट्टाछुट्टै शिष्टाचार भेटवार्ता गरे ।
राष्ट्रपतिका प्रेस सल्लाहकार किरण पोखरेलका अनुसार शीतल निवासमा भएको भेटमा राष्ट्रपति पौडेलले जलवायु परिवर्तनको असर न्यूनीकरणका लागि नेपाल र भारत मिलेर काम गर्नुपर्ने बताएका थिए ।
राष्ट्रपति पौडेलले कृषिको आधुनिकीकरण, पूर्वाधार विकास, जलविद्युत्, व्यापार, लगानी, पर्यटन तथा मानव संसाधन विकास नेपालको प्राथमिकता रहेको पनि उल्लेख गरेका थिए । उनले नेपालमा जलविद्युत् विकास, दिगो एवम् सहज ऊर्जा व्यापारका लागि प्रशस्त सम्भावना रहेको बताएका थिए । ‘भेटमा भारतीय विदेश सचिव मिस्रीले जलवायु परिवर्तनको असर न्यूनीकरणको विषय दुवै देशका लागि चुनौती रहेकाले यसमा मिलेर काम गर्ने प्रतिबद्धता व्यक्त गर्नुभयो,’ राष्ट्रपतिका प्रेस सल्लाहकार पोखरेलले भने, ‘विदेश सचिव मिस्रीले नेपाल र भारतबीचको सम्बन्ध जति सुमधुर हुन्छ, त्यति नै दुवै देशका जनताको हित हुने उल्लेख गर्दै भारतले स्थिर, शान्त र समृद्ध नेपाल हेर्न चाहेको पनि प्रस्ट पार्नुभयो ।’
यस्तै सचिव मिस्रीले बूढानीलकण्ठ पुगेर कांग्रेस सभापति देउवासँग शिष्टाचार भेटवार्ता गरे । उक्त अवसरमा द्विपक्षीय हित र सहकार्यलाई जोड दिने विषयमा कुराकानी भएको सभापति देउवाका स्वकीय सचिव भानु देउवाले जानकारी दिए ।
त्यसपछि मिस्री पूर्वप्रधानमन्त्री दाहाललाई भेट्न खुमलटार पुगेका थिए । भेटमा दुई मुलुकबीचको सम्बन्धलाई थप बलियो रूपमा अघि बढाउने विषयमा कुराकानी भएको दाहालकी स्वकीय सचिव गंगा दाहालले जानकारी दिइन् । उक्त अवसरमा पूर्वप्रधानमन्त्री दाहालले आफ्नो कार्यकालमा भारतसँग भएका समझदारी र सम्झौता कार्यान्वयनमा जोड दिएका थिए ।
अघिल्लो महिना मात्र विदेश सचिवको जिम्मेवारी सम्हालेका मिस्री परिचयात्मक भ्रमणका क्रममा नेपाल आएका हुन् । उनी परराष्ट्र सचिव लम्सालको निमन्त्रणामा दुईदिने भ्रमणका लागि आइतबार काठमाडौं ओर्लेका हुन् ।
मिस्रीलाई त्रिभुवन अन्तर्राष्ट्रिय विमानस्थलमा परराष्ट्र सचिव सेवा लम्सालले स्वागत गरेकी थिइन् । त्यसपछि उनी सिधै लैनचौरस्थित भारतीय दूतावास पुगे । दूतावास परिसरमै उनले बिरुवा रोपे ।
त्यसपछि नेपाल भाषा परिषद्को नयाँ भवन उद्घाटन गर्न पुगे । मिश्रीले गृहमन्त्री रमेश लेखकसँग पनि भेट गरेका छन् । गृह मन्त्रालयमा भएको भेटवार्तामा समसामयिक विषयमा कुराकानी भएको गृहमन्त्रीको सचिवालयले जनाएको छ ।
यस्तै उपप्रधानमन्त्री एवं अर्थमन्त्री विष्णुप्रसाद पौडेलसंग पनि उनको भेटवार्ता भएको छ । सिंहदरबारस्थित अर्थ मन्त्रालयमा सोमबार बिहान उनीहरुबीच भेटवार्ता भएको हो ।
त्यसक्रममा उनीहरुबीच आर्थिक तथा विकास सहायता, चालू आयोजनाहरुको तीव्रता, दुई देशबीचको आपसी सम्बन्ध लगायतका विषयमा छलफल भएको अर्थमन्त्री पौडेलको सचिवालयले जनाएको छ । मिस्री आजै उपप्रधान तथा सहरी विकासमन्त्री प्रकाशमान सिंह, परराष्ट्रमन्त्री आरजु राणा देउवा लगायतसँग शिष्टाचार भेटवार्ता गरी बेलुकी नयाँदिल्ली फर्कने छन् ।
