६ भदौ, विराटनगर ।
उदयपुरको बेलकामा दोस्रो संस्करणको बेलका गोल्डकप आयोजना हुने भएको छ । ब्रदरहुड एफसी बेलकाको आयोजनामा आगामी असोज महिनामा दोस्रो संस्करणको गोल्डकप आयोजना हुने भएको हो ।
ब्रदरहुडका संयोजक देविन मगरले दोस्रो संस्करणको गोल्डकपको तयारीमा आफूहरू जुटिसकेको जानकारी दिए । आयोजक क्लबको आधिकारिक फेसबुकमार्फत् पनि यसबारे जानकारी गराइएको छ ।
दोस्रो संस्करण असोजमा आयोजना गर्नेगरी तयारी भए पनि यकिन मिति भने तोकिएको छैन । चाँडै नै मिति, सहभागी टिम र पुरस्कार राशिबारे छिनोफानो गरेर पत्रकार सम्मेलनमार्फत जानकारी दिने आयोजकले जनाएको छ ।
गत वर्ष ब्रदरहुड एफसीले प्रथम आमन्त्रित बेलका मिनी गोल्ड कपका नामबाट प्रतियोगिता आयोजना गरेको थियो । बेलका नगरपालिका–४ स्थित जहडा लालबजार खेल मैदानमा उक्त प्रतियोगिता भएको थियो ।
आठ टिमको सहभागितामा भएको प्रतियोगितामा प्रथम र दोस्रो हुने टिमले क्रमशः ५० हजार, ३० हजार रुपैयाँ र ट्रफी, मेडल र प्रमाणपत्र पाएका थिए ।
यसपालि भने पुरस्कार राशि बढाउने योजनामा आफूहरू रहेको संयोजक मगरले जानकारी दिए ।
