१० भदौ, विराटनगर ।
बंगलादेश काठमाडौंमा जारी दक्षिण एसियाली फुटबल महासंघ (साफ) यु–२० च्याम्पियनसिपको फाइनलमा पुगेको छ । सोमबार (आज) भएको दोस्रो सेमिफाइनलमा डिफेन्डिङ च्याम्पियन भारतलाई हराउँदै बंगलादेश उपाधिनजिक पुगेको हो ।
सातदोबाटोस्थित एन्फा कम्प्लेक्समा भएको खेलको निर्धारित समय १-१ गोलको बराबरीमा सकिएको थियो । त्यसपछि विजेताको टुंगो पेनाल्टी सुटआउटबाट गर्नुपरेको थियो ।
टाइब्रेकरमा बंगलादेशले ४-३ गोलले बाजी मारेको हो । टाइब्रेकरमा भारतको पहिलो प्रहार बंगलादेशका गोलरक्षकले विफल पारेका थिए ।
त्यसअघि खेलको ३५औं मिनेटमा असदुल मोल्लाले गोल गर्दै बंगलादेशलाई सुरुआती अग्रता दिलाए । तर, खेलको ७४औं मिनेटमा भारतले बराबरी गोल फर्काएको थियो ।
यससँगै बंगलादेशले भारतसँग बदला लिएको छ । गत संस्करणमा भारतले पेनाल्टी सुटआउटमा बंगलादेशलाई पराजित गर्दै उपाधि जितेको थियो ।
अब, बंगलादेशले उपाधिका लागि घरेलु टोली नेपालसँग बुधबार खेल्ने छ । फाइनल खेल भने बुधबार साँझ ५ः३० बजे त्रिपुरेश्वरस्थित दशरथ रंगशालामा हुने छ ।
आइतबार भएको पहिलो सेमिफाइनल खेलको टाइब्रेकरमा भुटानलाई ४-१ गोलले हराउँदै नेपाल फाइनलमा पुगेको थियो ।
यसअघि समूह चरणको खेलअन्तर्गत बिहीबार भएको खेलमा नेपालले बंगलादेशलाई २–१ गोलले हराउँदै समूह विजेता बनेको थियो ।नेपालसँग हारे पनि बंगलादेश समूह ‘ए’ को उपविजेता बन्दै सेमिफाइनलमा पुगेको थियो । नेपाल र बंगलादेशले एक खेल अगावै सेमिफाइनलमा स्थान बनाएका थिए ।
