२४ भदौ ,एजेन्सी ।
सुपर टाइफुन यागीको प्रभाव जारी रहँदा चीनमा आपतकालीन प्रतिक्रिया प्रयासहरू परिचालन गरिएको छ। चीनको राज्य बाढी नियन्त्रण र खडेरी राहत मुख्यालयले युनान प्रान्तमा बाढीको लागि स्तर जोखिमको तह पार गरेको बताइएको छ । विपद् व्यवस्थापन मन्त्रालयले जलस्रोत मन्त्रालय र अन्य सरकारी निकायसँग समन्वय गरी क्षतिग्रस्त पूर्वाधार मर्मत गर्न र प्रभावित बासिन्दालाई राहत उपलब्ध गराउन संयुक्त निर्देशन दिएको छ ।
यो आँधीले चीनसंगै भियतनाम, र फिलिपिन्समा पनि प्रभाव पारेको छ । दर्जनौँ मानिसको मृत्यु भएको छ । ताइफुन यागी यो वर्ष एसियामा आएको अहिलेसम्मको सबैभन्दा शक्तिशाली समुद्री आँधी भएको जनाइएको छ । आइतबारबाट भने यो कमजोर बन्दै गएको छ । तर कमजोर बन्नुअघि नै यसले भियतनाम, चीनको हाइनान प्रान्त र फिलिपिन्समा दर्जनौँको ज्यान लिएको प्रारम्भिक रिपोर्टले देखाएका छन् ।
भियतनामको मौसम विभागले आइतबार आँधी केही कमजोर बनेको भने पनि बाढी र पहिलो जाने खतरा यथावत् रहेको चेतावनी जारी गरेको थियो । समुद्री आँधीका कारण हानोईमा कम्तीमा तीन जनाको मृत्यु भएको बताइएको छ । भियतनाममा मात्रै यसका कारण १४ जनाले ज्यान गुमाइसकेका छन् ।
हानोईबाट दक्षिणमा सय किमी पर रहेको होआ बिन्ह प्रान्तमा मात्रै पहिरोमा पुरिएर चार जनाको मृत्यु भएको छ । चीनको उत्तरी टापु हाइनानमा यागीका कारण चार जनाको मृत्यु भएको स्थानीय अधिकारीहरूले बताएका छन् । उता, फिलिपिन्समा पनि यो समुद्री आँधीका कारण मर्नेको सङ्ख्या १६ बाट बढेर आइतबार २० पुगेको बताइएको छ । अरू २२ जना बेपत्ता छन् ।
