२६ भदौ, बारा ।
बाराको निजगढ नगरपालिकामा एक व्यक्तिले खुर्पा प्रहार गरी श्रीमतीको ज्यान लिएका छन् । मंगलबार साँझ साढे ७ बजेतिर निजगढ-९ का ४६ वर्षीय विमलकुमार बस्नेतले श्रीमतीको हत्या गरेका हुन् ।
प्रहरीका अनुसार आफ्नी ४० वर्षीया श्रीमती लक्ष्मी राईको हत्या आरोपमा उनलाई पक्राउ गरिएको हो । खुर्पा प्रहार गरेर श्रीमतीको ज्यान लिने बस्नेतले आमालाई बचाउन गएका दुई छोरीलाई समेत घाइते बनाएका छन् ।
आमालाई बचाउन गएकी उनकी जेठी छोरी १८ वर्षीया गंगा र १५ वर्षीया जमुना घाइते भएको प्रहरीले जनाएको छ । जेठी छोरी गंगाको अवस्था गम्भीर रहेकाले उनलाई थप उपचारको लागि काठमाडौं पठाइएको छ ।
श्रीमान् विमलकुमार मादकपदार्थ सेवन गरी आएपछि वाइफाइको रिचार्ज सकिएको विषयमा विवाद भएको थियो । चारदिनदेखि घरको वाइफाइमा रिचार्ज सकिएको थियो ।
श्रीमतीले रक्सी खान पैसा हुने, वाइफाइमा रिचार्ज गर्न नहुने भनेपछि सुरु भएको विवादका क्रममा विमलले जथाभावी खुर्पा प्रहारेका थिए । त्यसक्रममा छोरीहरू बचाउन जाँदा खुर्पा प्रहारबाट उनीहरू पनि घाइते भएका हुन् ।
