२० माघ,एजेन्सी ।
भारतीय चर्चित गायक उदितनारायण झा चुम्बन प्रकरणका कारण विवादमा तानिएका छन्। एक महिला फ्यानलाई चुम्बन गरेको भन्दै उनको चर्को आलोचना भइरहेको छ। भारतीय संचारमाध्यामका अनुशार ३१ जनवरी राति उदित नारायण एक कन्सर्टमा गाउँदै थिए।
त्यसपछि सेल्फी खिच्ने क्रममा एक महिला फ्यानले उनको गालामा चुम्बन गरिन्। यसपछि उदितले ती फ्यानलाई ओठमा चुम्बन गरेको भिडिओ अहिले भाइरल भइरहेको छ। सामाजिक सञ्जालमा विभिन्न खाले टिप्पणी भइरहेको छ।
केहीले पछिल्लो प्रविधि आर्टिफिसियल इन्टलीजेन्स् एआईद्वारा भिडिओ बनाइको बताइरहेका छन् भने केहीले भने उदितको व्यवहार लज्जास्पद भन्दै टिप्पणी गरेका छन्। सामाजिक सञ्जालमा चर्को आलोचना भएपछि उदितले स्पष्टीकरण नै दिनुपरेको छ।
उनले प्रतिक्रियालाई सहज रुपमा लिँदै भनेका छन् ‘फ्यानहरू धेरै क्रेजी छन्। हामी त्यस्ता होइनौँ। हामी सभ्य मान्छे हौँ। केही मानिसहरूले यसलाई प्रचार गर्छन् र यसको माध्यमबाट आफ्नो माया व्यक्त गर्छन्।’
साथै उनले यसमा ध्यान नदिन आग्रह गरेका छन्। ‘यो कुरा भाइरल बनाएर के गर्ने? भिडमा धेरै मानिस थिए र हामीसँग अंगरक्षक पनि थिए। फ्यानले हामीलाई भेट्ने मौका पाउनुपर्छजस्तो लाग्छ। त्यसैले यस्तो अवस्थामा कोही हात मिलाउन हात फैलाउँछन्, कोही हात चुम्बन गर्छन्। यो सब क्रेज हो, यसमा त्यति ध्यान दिनुहुन्न।’
उदितनारायण हिन्दी र नेपाली गीतका कारण संगीतप्रेमीमाझ लोकप्रिय छन्।बलिउड संगीत उद्योगका सुनौलो आवाजका धनी उदितनारायण झा नेपाली माटोमा जन्मेर भारतीय संगीत क्षेत्रमा चम्केका एक बहुप्रतिभाशाली गायक हुन्।
उनको जन्म सन् १९५५ मा नेपालकै सप्तरीमा भएको थियो। नेपाली भूमि र संस्कृतिमा हुर्किएका उदितको प्रारम्भिक जीवन नेपालमै बित्यो। उनले आफ्नो संगीत यात्रा पनि नेपालबाटै सुरु गरेका थिए।
संगीतप्रति गहिरो मोह राख्ने उदितले आफ्नो करिअरको सुरुवात रेडियो नेपालबाट नेपाली गीत गाएर गरेका थिए। पछि, उनी भारतीय संगीत उद्योगमा प्रवेश गर्दै बलिउडका सुप्रसिद्ध गायक बने।उनले नेपाली, हिन्दी, मैथिली, नेपाल भाषा, उर्दु, तमिल, तेलगु, मलयालम, कन्नड, ओडिया, आसामी र सिन्धी भाषाहरूको चलचित्रमा पाश्र्व गायकको रूपमा गीत गाएका छन्।
उनले हालसम्म करीब ३२ भाषाहरूमा २५ हजार भन्दा बढी गीत गाएका छन्, जसमा २६० चलचित्रहरू हिन्दी भाषाका छन। उनले पद्म श्री पुरस्कार पाएका छन । नेपालका तत्कालिन राजा बिरेन्द्र बिर बिक्रम शाह देवबाट उनी सन् २००१ मा प्रबल गोर्खा दक्षिण बाहुबाट सुशोभित भएका थिए ।
साथै सन् २००९ मा भारतको उच्च सम्मान पदक पद्म श्री पुरस्कारबाट उनी सम्मानित भइसकेका छन् । उनको स्वरमा रहेको मिठास, भावप्रवाह र संगीतमय ऊर्जा आज पनि बलिउडदेखि नेपाली संगीत उद्योगसम्म उत्तिकै चर्चित छ।
नेपालमै जन्मिएर बलिउडमा राज गरेका उदितनारायण झा नेपाली श्रोताहरूका लागि मात्रै होइन, सम्पूर्ण नेपाली समुदायका लागि पनि गर्वको विषय बनेका छन्। उनका गीतहरू आज पनि नेपाली माटोमा उत्तिकै लोकप्रिय छन्, जसले उनको नेपालसँगको आत्मीय सम्बन्धलाई झल्काउँछ। यद्यपि बलिउडमा स्थापित भएपछि उनले आफनो जनस्थल विर्सिएको उनीमाथि आरोप लाग्ने गरेको छ ।
नेपाली गीत–संगीतप्रति लगाव राख्दै आफ्नो प्रारम्भिक जीवन नेपालमै बिताएका उदितले बलिउडमा प्रवेश गरेपछि “पापा कहते हैं बड़ा नाम करेगा“, “पहला नशा“, “मेरे ख्वाबों में जो आए“ जस्ता अजरअमर गीत दिए।
तर, नेपालमा उनको संगीत यात्रा सुरू भएको भए पनि बलिउडको सफलतापछि नेपालसँगको उनको सम्बन्ध झिनो भएको आलोचकहरू बताउँछन्। उनले गाएको पूरानो गीत मेची र काली गण्डकी कोशीले धेरैको मन छोएको थियो ।
तर, जब उनी बलिउडमा सफल भए, नेपाल फर्केर योगदान दिने अवसरमा चासो नदिएको आरोप लाग्ने गरेको छ। उनले भने आफू नेपालप्रति सधैं सम्मानभाव राख्ने बताउँदै आएका छन्।
