९ फागुन , काठमाण्डौ।
रुपन्देहीको सुप्रिम सहकारी ठगी प्रकरणमा १ करोड धरौटीमा रिहा भएका राष्ट्रिय स्वतन्त्र पार्टी (रास्वपा)का सभापति रवि लामिछानेको अब सोही सहकारी ठगी प्रकरणमा पुर्पक्षका लागि थुनामा रहेका पूर्वडीआईजी छविलाल जोशीसँगै सुनुवाइ हुने भएको छ ।
उच्च अदालत तुल्सीपुरको बुटवल इजलासका न्यायाधीशद्वय किरणकुमारी गुप्ता र पूर्णशीला दवाडी घिमिरेको संयुक्त इजलासमा बिहीबार भएको छविको मुद्दाको सुनुवाइको क्रममा सरकारी वकिलले लामिछानेको मुद्दालाई पनि जोशीको सँगै राखेर सुनवाइ गर्न माग गरेपछि इजलासले लामिछानेको कैफियत प्रतिवेदन एकैसाथ राख्न आदेश गरेको हो ।
सुप्रिम सहकारी ठगी प्रकरणमा गएको माघ १३ गते रूपन्देही जिल्ला अदालतका न्यायाधीश प्रह्लादकुमार योगीको इजलासले तत्कालीन प्रबन्ध निर्देशक लामिछानेलाई एक करोड धरौटीमा रिहा गर्न आदेश दिएको थियो ।
तर सोही मुद्दामा जिल्ला अदालत रूपन्देहीका न्यायाधीश वशिष्ठकुमार घिमिरेको इजलासले जोशीलाई भने पुर्पक्षका लागि थुनामा पठाउने आदेश भएको थियो । अदालतको थुनामा पठाउने आदेशविरुद्ध जोशीका छोरा रोचकले माघ २९ मै उच्च अदालतमा निवेदन दिएका थिए ।
उक्त निवेदनमा प्रारम्भिक सुनुवाइ गर्दै माघ ३० मा उच्च अदालतका न्यायाधीश राजेश्वर तिवारीको इजलासले कैफियत प्रतिवेदन झिकाउन आदेश गरेको थियो । सरकारी वकिलले फागुन १ मा लामिछानेलाई एक करोड धरौटीसहित तारेखमा रिहा गर्ने जिल्ला अदालतको आदेशविरुद्ध पनि निवेदन दिएको थियो ।
बिहीबार जोशीको मुद्दा न्यायाधीशद्वय गुप्ता र घिमिरेको इजलासमा पेसी तोकिएकामा सरकारी वकिलले लामिछानेविरुद्धको निवेदनसमेत उच्च अदालतमा दर्ता रहेको भन्दै एकैसाथ राख्न माग गरेको थियो ।
मागबमोजिम लामिछानेको कैफियत प्रतिवेदन साथमा नभएकाले अन्य आदेश भएको उच्च अदालत तुल्सीपुरको बुटवल इजलासका सूचना अधिकारी रामबहादुर कुँवरले बताएका छन् । एउटै प्रकृतिको मुद्दामा फरकफरक आदेश भएकाले एकसाथ राख्न माग गरिएको उच्च सरकारी वकिल कार्यालय बुटवलका सूचना अधिकारी वसन्तराज पोखरेलले बताएका छन् ।
एउटै प्रकृतिको मुद्दामा फरकफरक आदेश भएकाले उच्च अदालतले एकसाथ राखेर सुनुवाइ पछि समान प्रकृतिको आदेश हुने अपेक्षा सरकारी वकिलको रहेको छ । रविलाई पुर्पक्षका लागि थुनामा नपठाइएपछि सरकारी वकिलले पुर्पक्षका लागि थुनामा पठाउने आदेश माग गर्दै उच्च अदालतमा निवेदन दिएको छ।
तर, लामिछानेका तर्फबाट अहिलेसम्म पुनरावेदनको निवेदन परिसकेको छैन । सुप्रिम सहकारीका एक हजार ८३१ बचतकर्ताको ८६ करोड १८ लाख २३ हजार ७५४ रुपैयाँ हिनामिना गरेको अभियोगमा रवि र छविसहित २२ जनाविरुद्ध रूपन्देही जिल्ला अदालतमा मुद्दा दर्ता भएको थियो ।
जोशी गोर्खा मिडियामार्फत सहकारी ठगी गरेको अभियोगमा सूर्यदर्शन सहकारी ठगीमा ८८ लाख र काठमाडौंको स्वर्णलक्ष्मी सहकारी ठगीमा ५० लाख धरौटीको आदेश भएको थियो ।
सोही मुद्दामा सूर्यदर्शन ठगीमा रास्वपा सभापति लामिछानेविरुद्ध ६५ लाख, सूर्यदर्शन सहकारी ठगीमा जिल्ला अदालतबाट ६० लाख, सुप्रिम सहकारी ठगीमा रूपन्देही जिल्ला अदालतबाट एक करोड र साहारा चितवन सहकारी ठगीमा जिल्ला अदालत चितवनबाट ५४ लाख धरौटी हुने आदेश भएको छ ।
रविले कास्की जिल्ला अदालतको आदेशविरुद्ध भने कास्की उच्च अदालतमा रिट दायर गरेका छन् । सँगै सरकारी वकिलको कार्यालय कास्कीले पनि रविलाई पुर्पक्षका लागि थुनामा पठाउनु पर्ने माग गर्दै रिट दायर गरेको छ ।
अदालतले प्रारम्भिक सुनुवाइ गर्दै जिल्ला अदालतको आदेश मगाउने आदेश जारी गरेको छ । काठमाडौं जिल्ला अदालतमा भने रविले पहिलो तारिख बुझेका छन् । स्वर्णलक्ष्मीको मुद्दामा रविलाई गत माघ २ गते काठमाडौं जिल्ला अदालतले ६० लाख धरौटीमा रिहा गर्न आदेश दिएको थियो ।
तर जिल्ला सरकारी वकिल कार्यालय काठमाडौंले जिल्ला अदालतको आदेश बदरको माग गर्दै उच्च अदालत पाटनमा पुनरावेदन दिएको छ । रविले भने जिल्लाको फैसलाविरुद्ध उच्चमा रिट दायर गरेका छैनन् ।
रवि गत कात्तिक २ गते केन्द्रीय कार्यालयबाटै पक्राउ परेका थिए भने ८४ दिनपछि कास्कीबाट हिरासत मुक्त भएका थिए । रविलाई कास्की, काठमाडौं, रुपन्देही र चितवन जिल्ला अदालतले धरौटीमा छाड्न आदेश दिएको छ ।
अझै पर्सास्थित सानो पाइला सहकारीको मुद्दा दर्ता हुन बाँकी छ । रविसहित छविलाई पनि प्रहरीले पर्सा पुर्याएर बयान लिइसकेको छ ।
