११ चैत , काठमााण्डौ।
आज प्रमुख तीन दलका शीर्ष नेताहरूबीच छलफल हुँदै छ । प्रधानमन्त्रीसमेत रहेका एमाले अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच आज छलफल हुन लागेको हो ।
एकातिर सडकमा जारी रहेको राजावादीहरुको प्रदर्शन र आउँदो १५ गते उनीहरुले घोषणा गरेको बृहत प्रदर्शन अनि यसको काउन्टरमा गणतन्त्र पक्षधरहरुको पनि सोही दिनका लागि तोकिएको शक्ति प्रदर्शनको मिति नजिकिदै गर्दा आज प्रमुख तीन दलका नेताहरु छलफलमा जुट्न लागेका हुन् ।
दिउँसो ४ बजे सिंहदरबारमा तीन नेताबीच बैठक हुने भएको हो । यद्यपि बैठकमा संक्रमणकालीन न्याय (टीआरसी) लगायतका विषयमा छलफल हुने भनिएको छ । सत्य निरुपण तथा मेलमिलाप आयोग र बेपत्ता छानबिन आयोगमा पदाधिकारी नियुक्त हुनै बाँकी छ ।
त्यसका लागि सिफारिस समिति (सर्च कमिटी) समेत गठन हुन सकेको छैन । सिफारिस समितिमा सहमति जुटाउन तीन दलका शीर्ष नेताको बैठक बस्न लागेको प्रधानमन्त्री ओलीका मानव अधिकार तथा संक्रमणकालीन न्याय सल्लाहकार अग्नि खरेलले बताएका छन् ।
यसअघि पूर्वप्रधानन्यायाधीश ओमप्रकाश मिश्र नेतृत्वको सिफारिस समितिले सर्वसम्मतिमा सम्भावित पदाधिकारीको सूची तय गर्न नसकिएको भन्दै जिम्मेवारीबाट हात झिकेको थियो । यसअघि शीर्ष तीन नेताबीच चैत ६ गते नै बैठक गर्ने तयारी थियो ।
तर, माओवादी केन्द्रका अध्यक्ष प्रचण्ड पार्टीको तराई–मधेस जागरण अभियानका लागि काठमाडौँबाहिर गएपछि भेट हुन सकेन । तर अब यसका लागि प्रचण्ड आज काठमाडौं फर्कदैछन् ।
राजसंस्था पुनस्र्थापनाको माग गर्दै राजावादीहरुले सक्रियता बढाएपछि प्रमुख दलका नेताहरुको संयुक्त बैठक बस्न लागेको पहिलोपटक हो । आजको बैठकमा राजावादीहरुले बढाएको गतिविधि र गणतन्त्रवादी दलहरुको भूमिकाका विषयमा पनि छलफल हुने बताइएको छ ।
