२ वैशाख , एजेन्सी ।
रुसी राष्ट्रपति भ्लादिमिर पुटिन युक्रेनसँग ‘स्थायी शान्ति’ सम्झौताका लागि तयार भएका छन् । तीन वर्षभन्दा बढी चलेको युद्ध अन्त्य गर्ने वार्तापछि अमेरिकी राष्ट्रपति डोनाल्ड ट्रम्पका विशेष दूत स्टिभ विटकफले यसको खुलासा गरेका हुन् ।
ट्रम्पले मस्को र किभलाई युद्धविराममा सहमत हुन दबाब दिइरहेका छन् । तर, रुसी र अमेरिकी अधिकारीहरूबीच बारम्बार वार्ता भए पनि क्रेमलिनबाट कुनै ठूलो सहुलियत प्राप्त गर्न असफल भइरहेको सन्दर्भमा विटकफले सोमबार यस्तो बताएका हुन् ।
शुक्रबार विटकफले सेन्ट पिटर्सबर्गमा पुटिनसँग भेट गरे । रिपब्लिकन राष्ट्रपति ट्रम्प जनवरीमा ह्वाइट हाउस फर्केपछि उनीहरूको यो तेस्रो बैठक हो । सोमबार टेलिभिजनमा प्रसारण गरिएको फक्स न्युजको अन्तर्वार्तामा विटकेफले शान्ति सम्झौता ‘उदय हुँदै’ गरेको आफूले देखेको र पुटिनका दुई प्रमुख सल्लाहकार युरी उसाकोभ र किरिल दिमित्रिभ ‘प्रभावशाली बैठक’ मा रहेको बताए ।
’पुटिनको अनुरोध यहाँ स्थायी शान्ति होस् भन्ने हो । त्यसैले युद्धविरामभन्दा पर हामीले त्यसको जवाफ पायौँ’, विटकफले भने, ’हामीलाई यो ठाउँमा पुग्न केही समय लाग्यो, मलाई लाग्छ हामी केही कुराको नजिक हुन सक्छौँ जुन विश्वव्यापी रूपमा धेरै, धेरै महत्त्वपूर्ण हुनेछ ।’
उनले रुस र संयुक्त राज्य अमेरिका बीचको व्यापारिक सम्झौताहरू पनि वार्ताको हिस्सा रहेको बताए । ’मलाई लाग्छ केही धेरै आकर्षक व्यापारिक अवसरमार्फत रुसी–अमेरिकी सम्बन्धलाई पुनः आकार दिने सम्भावना छ, जसले यस क्षेत्रमा वास्तविक स्थिरता दिन्छ भन्ने मलाई लाग्छ’, उनले भने ।
युद्धविराम प्राप्त गर्ने ट्रम्पको मुख्य उद्देश्यमा थोरै अर्थपूर्ण प्रगति भएको छ । पुटिनले गत महिना द्वन्द्वमा पूर्ण र बिनासर्त विरामका लागि अमेरिका–युक्रेनी संयुक्त प्रस्तावलाई अस्वीकार गरेका थिए । क्रेमलिनले ब्लाक सीमा युद्धविराम गरेको छ र पश्चिमले केही प्रतिबन्धहरू हटाएको छ ।
यसबीच अमेरिकी राष्ट्रपति डोनाल्ड ट्रम्पले भने युक्रेन युद्धमा मारिएका मानिसहरूका लागि युक्रेनी राष्ट्रपति भोलोदिमिर जेलेन्स्की र रुसी राष्ट्रपति भ्लादिमिर पुटिन जिम्मेवार रहेको बताएका छन् । मंगलबार ह्वाइट हाउसमा पत्रकारहरूको प्रश्नको जवाफ दिने क्रममा ट्रम्पले यस्तो बताएका हुन् ।
‘जब युद्ध सुरु गर्नुहुन्छ, तपाईंलाई थाहा हुनुपर्छ कि आफूले युद्ध जित्न सक्छु भनेर,’ ट्रम्पले भने । यस युद्धको लागि ट्रम्पले पूर्व अमेरिकी राष्ट्रपति जो बाइडेनलाई पनि दोष दिएका छन् । ट्रम्पले ट्रुथ सोसलमा लेखेका छन्, ‘रुस र युक्रेनबीचको युद्ध मेरो होइन, बाइडेनको हो।’
उनले यो युद्धसँग आफ्नो कुनै सरोकार नभएको तर यो युद्ध अन्त्य गर्न र मृत्यु रोक्न काम गरिरहेको बताएका छन् । ट्रम्पले लेखेका छन्, ‘राष्ट्रपति जेलेन्स्की र विश्वासघाती बाइडेनले यो युद्ध सुरु गर्न धेरै नराम्रो भूमिका खेले, यसलाई सुरु हुनबाट रोक्न धेरै तरिका थिए। तर यो अब भइसकेको छ। अब हामीले यो युद्ध रोक्नुपर्छ र यसलाई छिटो रोक्नुपर्छ।’
यसअघि आइतबार रुसले युक्रेनको उत्तरपूर्वी सहर सुमीमा घातक आक्रमण गरेको थियो । यस आक्रमणमा परेर धेरै मानिसहरू मारिएका थिए । यस आक्रमणप्रति व्यापक आक्रोश देखिएको थियो । ट्रम्पको यो बयान सोही आक्रमणपछि आएको हो ।
