२४ कार्तिक , काठमाण्डौ ।
नेपाल प्रहरीको महानिरीक्षक (आईजीपी) मा एआईजी दानबहादुर कार्की नियुक्त भएका छन्।
उनी हाल काठमाडौं उपत्यका कार्यालय, रानीपोखरीमा कार्यरत छन्।
सोमबार बसेको मन्त्रिपरिषद्को बैठकले उनलाई महानिरीक्षक नियुक्त गर्ने निर्णय गरेको सूचना सञ्चार, सूचना तथा प्रविधिमन्त्री जगदीश खरेलले दिए।
प्रहरी नियमावलीअनुसार ३० वर्षे सेवा अवधि पूरा भएका वर्तमान आईजीपी चन्द्रकुवेर खापुङ २६ कात्तिक राति १२ बजेबाट अनिवार्य अवकाशमा जान लागेका छन्।
त्यसअघि नै सरकारले नयाँ महानिरीक्षकको नियुक्ति गरेको हो।
कार्कीले २४ भदौमा जेनजी आन्दोलनका बेला उपत्यकाको कमाण्ड सम्हालेका थिए भने २३ भदौमा उपत्यका कमाण्डमा एआईजीको नेतृत्व थिएन।
उपत्यका कमाण्ड सम्हाल्नु अघि उनी प्रहरी प्रधान कार्यालयको मानव स्रोत साधन विभागको प्रमुख थिए।
डीआईजीको रूपमा लुम्बिनी प्रदेशको कमाण्ड सम्हालेका उनले एसएसपीको जिम्मेवारीमा काठमाडौं जिल्ला प्रहरी परिसरको नेतृत्व गर्दै भुटानी शरणार्थी प्रकरण समेत व्यवस्थापन गरेका थिए।
काठमाडौं जिल्ला र उपत्यकाको चुनौतीपूर्ण कमाण्ड सम्हालेका कार्की इमान्दार र अनुभवी प्रहरी अधिकृतको रूपमा परिचित छन्।
उनी ठूलो आर्थिक विवादमा संलग्न नभएका हुन् र फिल्डदेखि आईजीपी सचिवालयसम्म कार्य अनुभव राख्छन्।
साथै, विदेशमा विभिन्न तालिम लिइसकेका उनी नेपाल प्रहरीका पूर्व केन्द्रीय प्रवक्तासमेत हुन्।
