१४ मंसिर , काठमाण्डौ ।
नेपाल प्रिमियर लिग (एनपीएल) अन्तर्गत आज कर्णाली याक्स र काठमाण्डु गोर्खाज आमने–सामने हुँदै छन् । कीर्तिपुरस्थित त्रिवि क्रिकेट मैदानमा दिउँसो साढे ३ बजे खेल सुरु हुनेछ ।
सोमपाल कामीको कप्तानीमा चारवटा प्रतियोगितामा सहभागी कर्णाली याक्सले एउटा मात्र जित निकालेको छ । दुई अंकका साथ कर्णाली छैटौँ स्थानमा छ । प्लेअफको यात्रामा रहिरहन उसलाई आज जित्नैपर्ने बाध्यता छ ।
करण केसीको नेतृत्वमा रहेको काठमान्डु पाँच खेलमा तीन खेलमा विजयी भएर तेस्रो स्थानमा छ । प्लेअफको यात्रामा पुग्न काठमान्डुका लागि पनि यो खेल महत्त्वपूर्ण छ। उता पाँच खेलमा पाँच जित निकालेको सुदूरपश्चिम रोयल्स २ खेल अगावै प्लेअफमा पुगेको छ ।
जकपुरलाई सहजै पराजित गर्दै सुदूरपश्चिम प्लेअफ पुग्ने पहिलो टिम बनेको हो । गत सिजन पनि यस्तै प्रदर्शनसहित शीर्ष स्थान हासिल गरेको सुदूरपश्चिमले उपाधि जित्न भने सकेन ।
फाइनलमा जनकपुर नै बाधक बन्दा उपाधिमा चुकेको सुदूरपश्चिम दोस्रो संस्करणमा त्यो भोकलाई मेटाउन व्यग्र देखिन्छ । पहिलो इनिङमा निर्धारित २० ओभर नै ब्याटिङ गरे पनि जनकपुर आठ विकेट गुमाएर १४५ रनसम्म पुग्न सक्यो ।
टी–२० क्रिकेटको यो मध्यम लक्ष्य पूरा गर्न सुदूरपश्चिमले कुनै संघर्ष गर्नुपरेन । १७.४ ओभरमा चार विकेट गुमाउँदा सुदूर लक्ष्यसम्म पुगिसकेको थियो । जनकपुरलाई मध्यम योगफलमा रोक्न अविनाश बोहोराले ४ र स्कट कुग्गेलिनले तीन विकेट लिए ।
एक विकेट कप्तान दीपेन्द्रसिंह ऐरीको नाममा रह्यो । चार खेल खेल्दा सबैमा हार बेहोरेको जनकपुरको प्लेअफ समीकरण लगभग समाप्तको स्थितिमा छ । तालिकामा अंकविहीन जनकपुरको गणितीय आधार मात्रै बाँकी रहे पनि सम्भावना निक्कै न्यून देखिन्छ ।
यी चारै खेलमा जनकपुरले ब्याटिङमा निक्कै संघर्ष ग¥यो । शीर्ष क्रममा ब्याटर जिम्मेवारी वहनमा चुक्दा टोलीले हालसम्म १४५ भन्दा माथिको स्कोर छुनै सकेको छैन । शनिबार सुदूरपश्चिमविरुद्धको १४५ रन नै एनपीएलको दोस्रो संस्करणमा साविक विजेताले बनाएको सबैभन्दा ठूलो स्कोर हो ।
यसअघिका तीन खेलमा झन् जनकपुरले १३० रनको स्कोरसमेत पार गर्न नसकेको तथ्यांक छ । जनकपुरले आफ्नो पहिलो खेलमा काठमाण्डू गोर्खाजविरुद्ध १३० रन, विराटनगर किंग्सविरुद्ध १२६ रन र पोखरा भएभेन्जर्सविरुद्ध पनि १३० रनमात्रै बनाएको थियो ।
ब्याटिङमै ‘फ्लप’ बनेपछि जनकपुरले नियमित कप्तान अनिलकुमार साहलाई नै बेन्चमा राखेका थियो । उनको स्थानमा पार्नेलले कप्तानी गरेका थिए । दोस्रो संस्करणमा ‘अजेय’ बनेको सुदूरपश्चिम लगातार पाँच जितसँगै १० अंकसहित शीर्ष स्थानमा छ ।
प्लेअफ पुग्ने पहिलो टिम बने पनि सुदूरपश्चिमको स्थान भने अबका दुई खेलपछि मात्रै निश्चित हुनेछ । प्रतियोगिताको समूह चरणमा अब सुदूरपश्चिमले चितवन राइनोज र विराटनगर किंग्सविरुद्ध मात्रै खेल्न बाँकी छ ।
यस सिजन सुदूरपश्चिमले यसअघिका चार खेलमा काठमाण्डू गोर्खाजविरुद्ध २९ रन, पोखरा एभेन्जर्सविरुद्ध १८ रन, कर्णली याक्सविरुद्ध ४५ र लुम्बिनी लायन्सविरुद्ध सात विकेटको सहज जित निकालेको थियो ।
