२२ मंसिर , काठमाण्डौ।
त्रिवि अन्तरराष्ट्रिय क्रिकेट रङ्गशाला कीर्तिपुरमा जारी दोस्रो संस्करणको नेपाल प्रिमियर लिग (एनपीएल) मा आज विश्राम दिन हो । लिग चरणका सबै खेल सकिएपछि मैदान व्यवस्थापनका लागि आज विश्राम राखिएको हो । प्रतियोगिता अन्तर्गत अब भोलि मंगलबार पहिलो क्वालिफायर खेल हुनेछ ।
अपरान्ह ४ बजे हुने खेलमा सुदूरपश्चिम रोयल्स र विराटनगर किङस प्रतिस्पर्धा गर्नेछन् । सुदूरपश्चिम अङ्क तालिकाको शीर्ष र विराटनगर दोस्रो स्थानमा रहेर पहिलो क्वालिफायर खेल्ने पक्का गरेका हुन् । सुदूरपश्चिम लिग चरणका सात खेलमध्ये छ र विराटनगरले भने सातमध्ये पाँच खेल जितेको थियो ।
सुदूरपश्चिमले विराटनगरसँग मात्रै लिग चरणमा पराजय भोग्नुपरेको थियो । विराटनगर भने चितवन र लुम्बिनीसँग पराजित भएको हो । हिजो त्रिवि क्रिकेट रंगशालामा लिग चरणको अन्तिम खेलमा अघिल्लो संस्करणको बिजेता जनकपुर बोल्ट्समाथि कर्णाली याक्सले ३ रनको रोचक जित निकालेको छ ।
अन्तिम खेलमा जित निकालेसँगै ७ खेलबाट ४ अंक जोडेर कर्णाली छैटौं स्थानमा छ । साविक विजेता जनकपुर भने २ अंकसहित पुछार अर्थात् आठौं स्थानमा पुग्यो । जनकपुरले एक खेलमा मात्र जित निकाल्न सक्यो ।
लिग चरणका खेलहरु सकिँदा अंक तालिकामा सुदूरपश्चिम रोयल्स ७ खेलबाट ६ जित निकाल्दै १२ अंक जोडेर शीर्ष बन्यो । दोस्रो स्थानको विराटनगर किंग्स र तेस्रो स्थानको काठमान्डु गोर्खाजले ५–५ जीत निकाल्दै १० अंक जोडे । रनरेटमा भने विराटनगर अघि रह्यो ।
चौथो बनेको लुम्बिनीले ४ खेलमा जित र ३ खेलमा हार बेहोर्दै ८ अंक जोडेको छ । अंक तालिकामा पोखरा एभेन्जर्स पाँचौ भएको छ । उसले ६ अंक जोडेको छ । चितवन राइनोज पनि ४ अंकसहित सातौं स्थानमा छन् ।
अब भोली हुने खेलको विजेता फाइनल पुग्नेछ । पराजित हुने टोलीले आउँदो बिहीबार हुने दोस्रो क्वालिफायरमा मौका पाउनेछ । पर्सि काठमान्डु र लुम्बिनीबीच इलिमिनेटरको खेल हुनेछ । जित हात पार्ने टोली दोस्रो क्वालिफायरमा पुग्नेछ भने पराजित हुने टोली बाहिरिनेछ ।
दोस्रो क्वालिफायरको विजेता पनि आउँदो २७ गते शनिबार हुने फाइनलमा पुग्नेछ । अहिलेसम्मको खेल हेर्दा सुदूरपश्चिम र विराटनगरलाई नै फाइनलको दाबेदार मानिएको छ । सुदूरपश्चिम रोयल्सले यो सिजन उत्कृष्ट प्रदर्शन गर्दै आएको छ ।
टोली लगातार ६ खेलमा अपराजित रहेको सुदूरपश्चिम आफ्नो अन्तिम खेलमा भने विराटनगरसंग ६ विकेटले पराजित भएको हो । गत सिजन पनि टोली लिग चरणपछि समान अंक बटुलेर शीर्ष स्थानमा रहेको थियो ।
टोलीले पहिलो क्वालिफायरमा जनकपुर बोल्ट्सलाई हराएर फाइनलमा स्थान बनाएको थियो । तर फाइनलमा जनकपुरले टोलीलाई स्तब्ध पार्दै उपाधि हात पारेको थियो । यता गत सिजनको तुलनामा विराटनगर किंग्स्ले यो सिजन सुधारिएको प्रदर्शन गरेको छ ।
गत सिजन टोली लिग चरणपछि छैटौं स्थानमा सिमिति बनेको थियो । सात खेलमा मात्र २ खेल जितेर टोलीले ४ अंक मात्र बटुल्न सकेको थियो । यो सिजन भने टोलीले ७ मध्ये ५ खेलमा जित र २ खेलमा हार बेहोरेको छ ।
१० अंक बटुलेर नेट रनरेटको आधारमा समान अंक बनाएको काठमाडौं गोर्खाजलाई पछि पार्दै टोलीले दोस्रो स्थान ओगट्न सफल भयो । विराटनगरले यो सिजन पहिलो तीन खेलमा पोखरा एभेन्जर्स, काठमाडौं गोर्खाज र जनकपुर बोल्ट्सलाई हराउँदै राम्रो सुरुवात गरेको थियो ।
चौथो खेलमा भने चितवन राइनोजसंग ४८ रनले स्तब्ध बनेपनि अर्को खेलमा भने कर्णाली याक्सलाई ३ विकेटले हराएको थियो । तर फेरि छैंटौं खेलमा विराटनगर लुम्बिनी लायन्ससंग ५ विकेटले पराजित भयो ।
अन्तिम खेलमा अपराजित सुदूरपश्चिमलाई ६ विकेटले हराउँदै टोलीले सशक्तरुपमा लिग चरण अन्त्य गर्यो । अब भोली हुने पहिलो क्वालिफायरले सुदूरपश्चिम र विराटनगरमध्ये एउटालाई सिधै फाइनलमा लैजाने छ ।
त्यसो हुँदा भोलीको खेल निकै रोमाञ्चक र प्रतिस्पर्धात्मक हुनेछ । यसबीच सुदुरपश्चिम रोयल्सले नयाँ खेलाडी भित्र्याएको छ । उसका दुई अष्ट्रेलियन स्टार खेलाडीहरु जोस ब्राउन र क्रिस लिन प्लेअफ अगाडि नै घर फर्किएपछि रोयल्सलाई नयाँ विदेशी खेलाडी खोज्नुपर्ने भएको हो ।
रोयल्सले विदेशी खेलाडीको एक रिक्त स्थानमा सेल्डन फिलिप ज्याक्सनलाई अनुवन्धित गरेको छ । उनी भारतीय खेलाडी हुन् । ज्याक्सनसँग राष्ट्रिय टिमबाट खेलेको अनुभव भने छैन । उनले फस्र्ट क्लासका १०६ म्याच खेलेको अनुभव छ, जसमा उनले २१ शतक र ३९ अर्धसतक बनाएका छन् ।
सन् २०१२–१३ को रणजी ट्रफी सिजनमा उनले चार अर्धशतक र तीन शतक हान्दै सनसनीपूर्ण प्रदर्शन गरेका थिए । ३९ वर्षिय ज्याक्सनले आइपीएलमा कोलकत्ता नाइट राइडर्स र रोयल च्यालेन्जर्स बैंगलोरबाट खेलेका छन् ।
उनी विकेटकिपर ब्याट्सम्यान हुन् । आइपीएलमा भने उनी सफल हुन सकेनन् । २०१७ देखि २०२२ सम्म ९ म्याचमा अवसर पाउँदा कुल ६१ रन मात्रै जोडेका छन् । सेल्डनले यसै वर्ष व्यवसायीक क्रिकेटबाट सन्न्यास लिने घोषणा गरेका थिए ।
