२१ चैत , काठमाण्डौ ।
कलाकार सागर लम्साल ‘बले’ बलात्कार आरोपमा पक्राउ परेका छन्। जिल्ला प्रहरी परिसर काठमाडौंका अनुसार उनलाई बुधानीलकण्ठ क्षेत्रबाट गएराति नियन्त्रणमा लिइएको हो। प्रहरीका प्रवक्ता एसपी पवनकुमार भट्टराईले घटनाबारे जानकारी दिँदै लम्सालमाथि गम्भीर प्रकृतिको आरोप लागेकाले अनुसन्धान अघि बढाइएको बताएका छन्।
प्रहरीका अनुसार अमेरिकामा बसोबास गर्दै आएकी एक नेपाली युवतीले लम्सालविरुद्ध बलात्कारको आरोप लगाएकी हुन्। ती युवतीले सामाजिक सञ्जाल फेसबुकमार्फत आफ्नो अनुभव सार्वजनिक गर्दै करिब एक वर्षअघि अमेरिका बसाइका क्रममा उक्त घटना भएको दाबी गरेकी छन्।
उनका अनुसार लम्सालले ‘तिम्रो अपार्टमेन्ट हेरौँ’ भन्दै आफू बसेको स्थानमा पुगेका थिए। युवतीको आरोप अनुसार, सुरुमा आफूले चिनेजानेकै व्यक्ति भएकाले सहज रूपमा भेटघाट गरेको र व्यक्तिगत संघर्षका विषयमा कुराकानीसमेत गरेको बताएकी छन्।
तर त्यस क्रममा लम्सालले अप्रत्याशित रूपमा दुर्व्यवहार गर्दै बलात्कार गरेको उनको दाबी छ। उनले पोस्टमा लम्सालको व्यवहारलाई ‘राक्षसी प्रवृत्ति’ भन्दै कडा शब्दमा आलोचना गरेकी छन्। ती युवतीले लामो समयदेखि पारिवारिक सम्बन्ध रहेको व्यक्तिबाटै यस्तो व्यवहार भोग्नुपर्दा आफू गम्भीर मानसिक आघातमा परेको उल्लेख गरेकी छन्।
साथै, नेपालमा न्याय पाउने विषयमा आफू अझै आशंकित रहेको पनि उनले जनाएकी छन्। यद्यपि यस्ता घटनाहरू दोहोरिन नदिन र अन्य पीडितलाई पनि बोल्न प्रेरणा मिलोस् भन्ने उद्देश्यले आफूले घटना सार्वजनिक गरेको बताएकी छन्।
प्रहरीले भने घटनाको सत्यतथ्य पत्ता लगाउन आवश्यक अनुसन्धान प्रक्रिया अघि बढाइएको जनाएको छ। आरोपको पुष्टि नभएसम्म कसैलाई दोषी ठहर गर्न नमिल्ने भन्दै प्रहरीले प्रमाण संकलन, बयान लिने तथा अन्य कानुनी प्रक्रिया अगाडि बढाइरहेको जनाएको छ।
यस घटनाले सामाजिक सञ्जालदेखि आम जनमानससम्म व्यापक चर्चा पाएको छ। कलाकारजस्तो सार्वजनिक व्यक्तिमाथि यस्तो गम्भीर आरोप लागेपछि यसको निष्पक्ष छानबिन हुनुपर्ने मागसमेत उठ्न थालेको छ।
प्रहरीले अनुसन्धानलाई प्राथमिकतामा राख्दै आवश्यक तथ्य र प्रमाणका आधारमा थप कानुनी प्रक्रिया अघि बढाउने जनाएको छ।
