एजेन्सी, कात्तिक १०
श्रीलंकामा संवैधानिक संकटको स्थिति देखिएको छ । राष्ट्रपति मैत्रीपाला सिरिसेनाले पूर्वराष्ट्रपति महिन्द्रा राजपाक्षेलाई प्रधानमन्त्रीमा नियुक्त गरेपछि संवैधानिक संकटको स्थिति देखिएको हो ।
राष्ट्रपति मैत्रीपाला सिरिसेनाले प्रधानमन्त्री रनिल विक्रमासिंघेलाई अपदस्थ गरी नयाँ प्रधानमन्त्रीको रुपमा पूर्वराष्ट्रपति राजपाक्षेलाई नियुक्त गरेका हुन् । यसलाई श्रीलंकाको राजनीतिमा नाटकीय घटनाको रुपमा लिइएको छ ।
विक्रमासिंघेले भने संसदमा आफ्नो बहुमत रहेको र बहुमत रहेसम्म आफूनै प्रधानमन्त्री रहीरहने बताएका छन् । सरकारका प्रवक्ता रजिताले सेनारत्नेले पनि विक्रमासिंघे नै प्रधानमन्त्री भएको बताएका छन् । महिन्द्रा राजपाक्षेले ट्वीटर एकाउन्टमा आफ्नो परिचय परिवर्तन गर्दै श्रीलंकाका प्रधानमन्त्री उल्लेख गरेका छन् ।
यस्तै रनिल विक्रमासिंघेको ट्वीटर प्रोफाइलमा पनि आफू नै प्रधानमन्त्री भएको उल्लेख छ । सन् २०१४ मा भएको राष्ट्रपतीय निर्वाचनमा सिरिसेनाले राजपाक्षेलाई पराजित गरेका थिए ।
राष्ट्रपति सिरिसेनाले उहाँको पार्टी युनाइटेड नेसनल फ्रिडम एलाइन्स र रनिल बिक्रमासिंघेको युनाइटेड नेसनल पार्टीबीचको गठबन्धन समाप्त भएको घोषणा गरेलगतै प्रधानमन्त्रीलाई बर्खास्त गरेका हुन् । पछिल्लो केही हप्ता श्रीलंकाका राष्ट्रपति र प्रधानमन्त्रीबीच सरकार चलाउने विषयमा संघर्ष चल्दै आएको थियो ।
