काठमाडौँ, कात्तिक १७
आगामी मङ्सिर २१ गतेबाट प्रदर्शनमा आउन लागेको नेपाली चलचित्र ‘प्रसाद’को ट्रेलर सार्वजनिक भएको छ । ट्रेलर शुक्रवार चर्चित रियालिटी शो नेपाल आइडलबाट सार्वजनिक गरिएको थियो ।
चलचित्र निसन्तान दम्पत्तीको कथामा आधारित रहेको छ भने चलचित्र ‘प्रसाद’मा अभिनेताद्धय विपिन कार्की, निश्चल बस्नेत र अभिनेत्री नम्रता श्रेष्ठको मुख्य भूमिका रहेको छ ।
सार्वजनिक ट्रेलरमा विपिन र नम्रता बिचको सम्बन्ध टुटाउन निश्चलको चलखेल देखिन्छ । चलचित्रमा समावेश रहेको ‘लै लै’ बोलको गीत यति बेला चर्चामा छ भने अर्को गीत बनकी चरी पनि सार्वजनिक भइसकेको छ ।
‘प्रसाद’लाई दिनेश राउतले निर्देशन गरेका हुन् भने सञ्चारकर्मी सुशील पौडेलले कथा लेखेका हुन् । सुवास थापा इन्टरटेनमेन्टको ब्यानरमा बनेको ‘प्रसाद’मा राजेश श्रेष्ठको छायाङ्कन, सुवास भुषाल र कोसिस क्षेत्रीको सङ्गीत, शिव विकको कोरियोग्राफी, हिमाल केसीको थ्रिल, लोकेश बज्राचार्यको सम्पादन रहेको छ ।
