विराटनगर, जेठ ११
तोकिएको मापदण्ड पूरा नगरी विराटनगरमा निमार्ण गरिएको नाला शनिबार भत्काइएको छ । निर्धारण गरिएको भन्दा कम सिमेन्ट प्रयोग गरेर बनाइएको नाला विराटनगर ११ महेन्द्रचौकका स्थानीयले भत्काउन लगाएका हुन् ।
विराटनगर ११ महेन्द्रचोक पछाडी निर्माणाधीन नालामा मापदण्डभन्दा कम सिमेन्ट प्रयोग गरिनुका साथै प्लास्टर गर्दा प्रयोग गरिने बालुवा इंटाको जोडाइमा प्रयोग गरिएको फेला परेपछि स्थानीयले वडाध्यक्षलाई बोलाएर नाला भत्काउन लगाएका हुन् ।
निर्माणस्थलमा पुगेका महानगर वडा नम्बर ११ का वडाध्यक्ष तीर्थेन्द्र न्यौपानेले निर्माणाधीन नाला भत्काउन लगाएका हुन् । मापदण्ड पूरा नगरी निमार्ण गरिएको जोडाइ हुंदै गरेको २५ मिटर नाला भत्काइएको छ ।
नाला निमार्णगर्दा ४ तगारीमा १ तगारी सिमेन्ट हाल्नुपर्नेमा मजदुरहरुले ८ तगारीमा १ तगारी मात्र सिमेन्ट हालेको भेटिएपछि गुणस्तरका लागि नाला भत्काउन लगाएको वडाध्यक्ष न्यौपानेले बताए ।
विराटनगरमा जारी सडक नाला निमार्णकार्यमा सरोकारवालाहरुले अनुगमन नगरेको भन्दै गुणस्तरहीन काम हुदै आएको नगरवासीले आरोप लगाउदै आएका छन । उनीहरुले चाडो गर्ने नाममा गुणस्तरहीन निमार्ण हुने भन्दै सबैले अनुगमन र खबरदारी गर्नुपर्नेमा जोड दिएका छन् ।
