३१ बैशाख, पर्सा, बारा । कोरोना संक्रमितको संख्या बढेसँगै पर्सा र बारामा जिल्ला सुरक्षा समितिहरूले निषेधाज्ञा जारी गरेका छन् ।
पर्सामा मंगलबार साँझ ८ बजेदेखि र बारामा आज बुधबार बिहान ६ बजेदेखि लागू हुने गरी निषेधाज्ञा जारी गरिएको छ ।
पर्साका प्रमुख जिल्ला अधिकारी विष्णुकुमार कार्कीको अध्यक्षतामा मंगलबार बसेको आकस्मिक बैठकले जेठ ५ गतेसम्मका लागि निषेधाज्ञा लगाउने निर्णय गरेको हो । आवश्यकता हेरेर निषेधाज्ञाको म्याद थप्न पनि सकिने बैठकमा सहभागी एक सुरक्षा अधिकारीले बताए ।
सरसफाइ, खाद्यान्न तथा बैंकको काउन्टर आदिको व्यवस्थापन गर्दै निषेधाज्ञा जारी गरिएको हो । यस अवधिमा सुरक्षाको जिम्मेवारी सेनालाई दिइएको छ ।
भारतसँगको खुला सीमा र लकडाउन उल्लंघनका कारण कोरोना नियन्त्रण जटिल बन्दै गएको छ । स्वास्थ्य कार्यालय पर्साले पछिल्लो संक्रमितको संख्याले जिल्लाको अवस्था अत्यन्त जोखिमपूर्ण हुन पुगेको बताएको छ । स्वाब संकलन र परीक्षण जारी भएकाले नतिजा पनि क्रमशः आउने बताइएको छ ।
बारामा पनि कोरोना संक्रमितको संख्या बढेसँगै केही दिनदेखि खुकुलो पारिएको लकडाउनलाई पुनः कडाइ गरिएको छ । जिल्ला प्रशासन कार्यालयले बुधबार बिहानदेखि अनिश्चितकालका लागि जिल्लाभर निषेधाज्ञा जारी गरेको छ ।
प्रमुख जिल्ला अधिकारी रुद्रप्रसाद पण्डितका अनुसार बारा–पर्सा आउजाउ निषेध गरिएको छ । साथै जारी गरिएका हस्तलिखित र अनलाइन पास (गम्भीर बिरामीको पासबाहेक) बुधबारदेखि लागू हुने गरी रद्द गरिएको उनले बताए ।
अति आवश्यक ढुवानी र पसल सञ्चालनबाहेक विकास निर्माण र उद्योगमा वीरगन्जका मजदुरलाई काममा नलगाउनसमेत प्रजिअले निर्देशन दिएका छन् ।
