६ जेष्ठ, बैतडी ।
बैतडीमा दुईजना जनप्रतिनिधि कुटिएका छन् ।
पुर्चौडी नगरपालिकाका प्रमुख रणबहादुर कुँवर र दोगडाकेदार गाउँपालिका ७ का वडाअध्यक्ष भरत महरा कुटिएका हुन् । नगरप्रमुख कुँवरमाथि सोमबार दिउँसो कार्यकक्षमै कुटपिट भएको पुर्चौडी नगरपालिकाका नगरप्रवक्ता दलबहादुर धामीले जानकारी दिए ।
स्थानीय युवाको एक समूहले नगरप्रमुख कुवँरमाथि कुटपिट गर्नुका साथै कार्यकक्ष र कार्यालयमा समेत तोडफोड गरेका छन् । कार्यालयको कम्प्युटर, ल्यापटप र कुर्सी, टेबुल समेत तोडफोड गरिएको प्रवक्ता धामीले बतए । आइतबार नगरप्रमुख कुँवरले ईलाका हुलाक कार्यालयमा कार्यरत दिलबहादुर धानुकमाथि कुटपिट गरेको भन्दै स्थानीय युवाले कार्यालयमा तोडफोड र जनप्रतिनिधिमाथि हातपात गरेको बताएका छन् ।
पुर्चौडीका स्थानीय समेत रहेका धानुकसँग भएको विवादका क्रममा नगरप्रमुख कुँवरले कुटपिट गरेको र उल्टै धानुकलाई पक्राउ गर्दै अभद्र व्यवहारको मुद्दा लगाइएको भन्दै धानुकका दुई छोरा र एक स्थानीयले आक्रोसित हुँदै नगरपालिकाको कार्यालयमा तोडफोड गर्दै कर्मचारी र जनप्रतिनिधिमाथि हातपात गरेको बताइएको छ ।
मदिरा सेवन गरेका बेला आइतबार हुलाकका कर्मचारी धानुकलाई नगरप्रमुख कुँवरले हातपात गरेको आरोप तोडफोड गर्ने पक्षको रहेको छ । हातपात र कार्यालयमा क्षति गर्ने तीनजनालाई पक्राउ गरिएको बैतडीका प्रहरी प्रमुख प्रहरी नायव उपरीक्षक डिल्लीनारायण पाण्डेयले जानकारी दिए ।
स्थानीय रमेश धानुक, पुस्कर धानुक र चन्द्र भण्डारीलाई प्रहरीले पक्राउ गरिएको प्रहरीले जनाएको छ । यस्तै दोगडाकेदार गाउँपालिका वडा नम्बर ७ का वडाअध्यक्ष भरत महरा पनि कुटिएका छन् ।
सोमबार स्थानीय सिल्लेगडा बजारमा युवाको एक समूहले वडाअध्यक्ष महरालाई कुटेको इलाका प्रहरी कार्यालय पाटनका प्रहरी निरीक्षक धनदेव साउदले जानकारी दिए । लकडाउनको उल्लंघन गर्दै गाडी किन चलाएको भन्दै युवाहरुलाई वडाअध्यक्ष महराले रोक्न खोज्दा बिवाद उत्पन्न भएको हो ।
बिवादले उग्र रुप लिएपछि कुटाकुटको स्थिति आएको प्रहरीले जनाएको छ । कुटपिटबाट वडाअध्यक्ष घाइते भएका छन् । घाइते वडाअध्यक्षलाई उपचारको लागि धनगढी गएका आएका छन् । वडाअध्यक्ष महराको नाकमुख, टाउको र पेटमा चोट रहेको छ ।
कुटपिटमा संलग्न रहेको भन्दै प्रहरीले चारजनालाई पक्राउ गरेको छ । पक्राउ पर्नेमा कृष्ण जोशी, हरि जोशी, नरिनराज जोशी र राजिब धामी रहेका छन् ।
