८ जेठ, विराटनगर ।
विराटनगरमाआफ्नै छोराहरुले बाबुकाे हत्या गरी घरभित्रै शव गाडेको खुलेको छ । विराटनगर महानगरपालिका–१४ झटियाही बस्ने ६९ वर्षीया सत्यराम भन्ने सिताराम चौहानलाई आफ्नै २ छोराहरुले हत्या गरेको खुलेको हो ।
चौहानको हत्याको अभियोगमा पक्राउ परेका उनकै जेठो छोरा २९ वर्षीय रोहितचौहान र माईलो छोरा २६ वर्षीय नगरेन्द्र चौहानलाई जिल्लाप्रहरी कार्यालय मोरङले बिहीबार डिजिटल प्रेसमिट गरी सार्वजनिक गरेको छ ।
चौहानको शव बुधबार साँझ आफ्नै घरभित्रको खाटमुनि खाल्डो खनी गाडेको अवस्थामा प्रहरीले फेला पारेको थियो । जेठ ३ गते शनिबार दुवै जना मजदुरी गरी ज्याला लिएर मादक पदार्थ सेवन गरी घर पुगेपछि बुबा सितारामले जेठो छोरा रोहितसँग पैसा माग्दा नदिएको विषयमा झगडा भएको र बुबालाई दुवैले कोदालोले प्रहार गरी हत्या गरेको खुलेको जिल्ला प्रहरी कार्यालय मोरङका एसपी विश्व अधिकारीले जानकारी दिए ।
एसपी अधिकारीका अनुसार नगेन्द्रकी श्रीमती जैन बखातुनले ससुरा ३÷४ दिन देखि घरमा नआएको र श्रीमानले बाबुलाई मारी दिएँ भन्ने कुरा सुनेपछि शंका लागी ससुराको घरमा गई हेर्दा खाटमुनी खनेजस्तो देखेकी थिइन् । उनले सो पश्चात श्रीमान नागेन्द्र समेतलाई लिई ईलाका प्रहरी कार्यालय रानीमा सुचना दिएकी थिइन् । प्रहरीलाई प्राप्त सुचनाका आधारमा अनुसन्धान थालेको इलाका प्रहरी कार्यालय रानी र जिल्ला प्रहरी कार्यालय मोरङको टोलीले बुधबार शव फेलापारेको थियो भने दुवै छोरालाई पक्राउ गरेको थियो ।
शनिबार राती झगडा हुँदा जेठो छोरालाई बाबुले धकेली भुँईमा झारीदिए पश्चात उनले बाबुलाई मारी दिन्छु भन्दै नजिकै रहेको कोदालोले टाउँकोमा प्रहार गरेको र माईलो छोरा पनि कोदालोले टाउँकोमा प्रहार गरी हत्या गरेको खुलेको एसपी अधिकारीले बताए । बाबुको मृत्यु पश्चात नागेन्द्र हडताली हाटमा रहेको आफ्नो डेरा कोठातर्फ गएका थिए भने रोहितले घटनास्थलमा भएको घरमा सुतेका थिए । उनीहरु दुवैजनाले ४ गते बिहान करिब साढे ५ बजे घरभित्रकोठामा रहेको खाटमुनी खाल्डो खनी शव गाडेका थिए ।
प्रहरीले घटनास्थलबाट कोदालो र लाश बेरिएको तन्ना बरामद् गरेको छ । पक्राउ परेकादुवै जनालाई कर्तव्यज्यान मुद्दामा थप अनुसन्धानकार्य भई रहेको प्रहरीले जनाएको छ ।प्रहरीका अनुसार चौहानका तीनमध्ये कान्छा छोरा सम्पर्कमा छैनन । मजदुरी गर्दै आएका विवाहित माइला छोरा छुट्टिएर बसेका थिए भने जेठा छोरा रोहित बाबुसँगै बस्दै आएका थिए ।
