१२ जेष्ठ, वीरगञ्ज ।
बाराका एक व्यक्तिको मृत्यु भएको नौ दिनपछि कोरोना भाइरसको संक्रमण रहेको पुष्टि भएको छ।
बाराको कलैया–७ का चौधरी थरका व्यक्ति सिकिस्त बिरामी परेपछि जेठ २ गते वीरगञ्जमा रहेको नेशनल मेडिकल कलेजमा भर्ना गरिएको थियो। भेन्टिलेटरमा राखिएका उनको जेठ ४ गते निधन भयो ।
अस्पतालले कोरोना भाइरसको संक्रमण भएको हुन सक्ने आशंकामा भर्ना भए लगत्तै स्वाब संकलन गरेर नारायण उपक्षेत्रीय अस्पतालको प्रयोगशाला पठाएको थियो। तर त्यसको रिपोर्ट १० दिनपछि सोमबार आएको हो।
नेशनल मेडिकल कलेजका प्रबन्ध निर्देशक बसरुद्दिन अनसारीले भनेका छन्, अस्पतलामा भर्ना भए लगत्तै हामीले स्वाब संकलन गरेर पठाएका थियौँ। रिपोर्ट नआउँदै जेठ ४ गते निधन भयो। हामीले शव परिवारको जिम्मा लगायौँ। अहिले आएर उनी कोरोना संक्रमित रहेको नारायणी अस्पतालका मेडिकल सुपरिटेन्डेन्ट मदन उपाध्यायले मलाई फोन गरेर जानकारी दिनुभयो। रिपोर्ट आउनै यति समय लाग्छ भने के गर्ने ?’
नेशनल मेडिकल कलेजले शंकास्पद बिरामीको मृत्यु भएपछि रिपोर्टको सोधखोज नै नगरी शव परिवारको जिम्मा लगाएको देखिएको छ। यस्तै स्वाब संकलन भएको लामो समयसम्म रिपोर्ट नआउँदा संक्रमण फैलिन सक्ने जोखिम बढेको छ ।
