योगेन्द्र योगी
२४ जेठ, दोहा ।
रोजगारीको लागि कुवेत पुगेका तीन नेपाली कामदारको मृत्यु भएको छ । दैलेखका ३९ बर्षिय प्रेम बहादुर चन्दको मृत्यु भएको छ । उनको के कारण मृत्यु भएको हो विस्तृत विवरण आउँन बाँकी रहेको कुवेतस्थित नेपाली दूताबासले जनाएको छ ।
मृतक चन्द लामो समय देखि कुवेतमा काम गर्दै आएका थिए । यता, लम्जुङका तेज गुरुङले पनि आत्माहत्या गरेका छन् । उनलाई कोरोना पोजेटिभ देखिएर क्वारेन्टाइनमा राखिएको र त्यहिँ आत्महत्या गरेको जनाइएको छ ।
बाग्लुङ घर भएकी निर्मला पुन मगरको पनि मृत्यु भएको जानकारी प्राप्त भएको छ । उनले अत्यधिक मदिरा सेवन गरेको कारण मृत्यु भएको भनिए पनि आधिकारिक रुपमा पोष्टमाटमको रिपोर्ट आउन बाँकी रहेको दूताबासले जनाएको छ ।
कोरोनाको कारण उडानमा अस्थायी रोक लागेपछि बिदेशमा ज्यान गुमाएका नेपालीको शव अलपत्र परेको छ। कोरोनाको नियन्त्रण तथा रोकथामका लागि लागू गरिएको लकडाउनका कारण शव पठाउन समस्या भएको खाडीस्थित नेपाली दूताबासहरुले जनाएका छन् ।
नेपालमा अन्तर्राष्ट्रिय उडानमा अस्थायी रोक लागेपछिको अवधिमा कतारमा ४० जना नेपाली कामदारको मृत्यु भएको कतारस्थित नेपाली दूतावासका द्वितीय सचिव प्रवीण भट्टराईले जानकारी दिएका छन् ।
सचिव भट्टराईले दिएको जानकारी अनुसार हालसम्म ९ वटा शव कतारमै दाहसंस्कार गर्न परिवारबाट सहमति प्राप्त भएको र ३ जनाको दाहसंस्कार सम्पन्न भईसकेको छ । वैदेशिक रोजगारीमा कोरोना लगायत भिबिन्न कारणले ज्यान गुमाएका सयभन्दा बढी नेपालीको शव अलपत्र अवस्थामा छ ।
त्यहाँस्थित दूताबासका अनुसार साउदीमा ३३,यूएईमा २१,कुवेतमा १० , बहराइन २ तथा ओमानमा एक जना नेपाली कामदारको शव अलपत्र अवस्थामा रहेका छन् । नेपाली सरकार गएको चैत ११ गतेदेखि जारी गरेको लकडाउनका कारण विदेशमा अलपत्र रहेका शव संगै समस्यामा रहेका नेपालीहरु फर्किन सकेका छैनन्।
यता , सुक्रबार मात्र पहिलो चरणमा म्यानमार सेनाको एयरफोर्समार्फत म्यानमारमा रहेका २६ नेपालीलाई काठमाडौंमा उतारी दिएको छ भने यूएईले पनि जहाज चार्टड गरेर एकसय ६८ जना नेपालीलाई नेपाल पठाएको छ ।
नेपाल सरकारले तय गरेको प्राथमिकताका आधारमा नेपाल पठाउने गरी दूतावासले सूची तयार गरेको थियो । तर, प्राविधिक कारण देखाउँदै उनीहरुलाई यूएईमै रोकिएको छ भने दूतावासकाे सूचीभन्दा बाहेकका नेपाली जहाजमा फर्किएका छन् ।
