योगेन्द्र योगी
२९ साउन, दोहा ।
कतारको एक प्रतिष्ठित कम्पनी नासर अलअली इन्टरप्राइसेसले आफ्ना ३ नेपाली कामदारलाई कम्पनीमा लामो समयसम्म इमान्दारीपुर्वक काम गरे वापत नगद रकम पुरस्कारसहित सम्मान गरेको छ । १० वर्षसम्म अत्यन्तै मेहनतका साथ काम गरेको भन्दै कम्पनीले प्रतिव्यक्ति जनही १५ हजार कतारी रियाल हस्तान्तरण गरेको हो ।
नेपाली रुपैँया अनुसार यो रकम झन्डै ५ लाख हुन आउछ । पुरुस्कार पाउने नेपालीहरुमा चिरिङ्ग शेर्पा, एलिसबहादुर राई तथा पन्चे राई रहेका छन । नासर अलअलि इन्टरप्राइसेस जस्तो राम्रो कम्पनी र यस कम्पनीको मालिक जस्तो सहृदयीमालिक अनि आफुले इमान्दारीपुर्वक कम्पनीको लागि काम गरेको कारणले नै नगद रकम पुरुस्कार पाएको नेपालीहरुले बताएका छन् ।
कम्पनीले एक न एकदिन इमान्दारिताको उच्च मुल्यांकन गर्ने रहेछ भन्ने आफूलाई पुर्ण विश्वास लागेको उनीहरुले बताएका छन् । आफनो घर परिवारमा आर्थिक समस्या परेको वेलामा समेत आर्थिक सहयोग उपलब्ध गराएर समस्या टारिदिने गरेको उनीहरुले बताएका छन् । समय समयमा कामदारहरुलाई प्रोत्साहन स्वरुप सुनको सिक्का, नगद, प्रमाणपत्र आदि पुरस्कार स्वरुप दिएर कम्पनीका मालिक नासर अलअलीले आफ्ना कम्पनीको कामदारहरुको हौसला र मनोवल बढाउँदै आइरहेको उनीहरुले बताएका छन् ।
