१५ भाद्र, एजेन्सी ।
अस्ट्रेलियाको भिक्टोरियामा पछिल्लो २४ घण्टामा कोभिड १९ संक्रमणबाट ४१ जनाको मृत्यु भएको छ।
एपीका अनुसार सोमबार भिक्टोरियामा ७३ नयाँ कोरोना संक्रमित पहिचान भएका छन्। कोरोनाको दोस्रो वेभको सामना गरिरहेको भिक्टोरियालाई भाइरसको हटस्पटको रुपमा लिने गरिन्छ। यहाँ संक्रमण बढ्दै गएपछि गरिएको लकडाउन हटाउने प्रस्ताव गरिएको बेला धेरै संख्यामा संक्रमितहरुको मृत्यु भएको हो।
अस्ट्रेलियाभर पहिलोपटक एकैदिन कोभिडका कारण यति धेरै संख्यामा संक्रमितहरुको मृत्यु भएको बताइएको छ। त्यसैले आजको दिनलाई अस्ट्रेलियामा ‘डेडलियस्ट डे अफ प्यान्डेमिक’ भनिएको छ। ६ हप्तादेखि लकडाउनमा रहेको भिक्टोरियामा सेप्टम्बर १३ मा लकडाउन खुकुलो गर्ने प्रस्ताव गरिएको थियो।
संक्रमण बढ्दै गएको अवस्थामा लकडाउन खुकुलो हुने वा हट्ने सम्भावना कम रहेको अधिकारीहरुले बताएका छन्। अस्ट्रेलियामा हालसम्म २५ हजारभन्दा बढीमा कोरोना संक्रमण पुष्टि भइसकेको छ। यी मध्ये ८० प्रति संक्रमित भिक्टोरियामामात्रै रहेको जनाइएको छ। कोभिड संक्रमणका कारण अस्ट्रेलियामा ६५० जनाभन्दा बढीको मृत्यु भइसकेको छ।
