२१ फागुन , काठमाण्डौ ।
प्रतिनिधि सभाको निर्वाचनको मतदान जारी छ। केही स्थानमा सामान्य विवाद बाहेक देशभर शान्तिपूर्ण रुपमा मतदान जारी रहेको छ । विहान ७ बजेदेखि मतदान भइरहेको छ। उत्साहजनक रुपमा मतदान भइरहेको निर्वाचन आयोगले जनाएको छ।
अहिलेसम्म उम्मेदवार रहेका अधिकांसले मत खसालेका छन्। शीर्ष तनि नेताहरु आफ्नो मतदाता नामावली रहेको क्षेत्रमा मतदान गरेर आफू उम्मेदवार बनेको निर्वाचन क्षेत्रमा हेलिकप्टरमार्फत पुगेका छन् । केही उम्मेदवारहरू मतदाता नामावली रहेको ठाउँमा मतदान गरेर उम्मेदवारी दिएको निर्वाचन क्षेत्र पुगेका छन भने कतिपय जाने क्रममै छन्।
नेपाली कम्युनिस्ट पार्टीका संयोजक पुष्पकमल दाहाल प्रचण्ड चितवन क्षेत्र नम्बर ३ अन्तर्गत भरतपुर–१४ स्थित नेपाल प्रहरी स्कुल शान्तिपुर मतदान केन्द्रबाट मत खसालेर रुकुम पूर्व पुगिसकेका छन्। उनी हेलिकप्टरमार्फत आफू उम्मेदवार रहेको क्षेत्र पुगेका हुन्।
यसैगरी,नेपाली कांग्रेसका सभापति गगन थापा काठमाडौँ ४ को मैतिदेवी मतदान केन्द्रमा मत खसालेर सर्लाही ४ पुगेका छन्। उनको सचिवालयका अनुसार थापा हेलिकप्टरबाट सर्लाही ४ पुगेका हुन्। यस्तै,राष्ट्रिय स्वतन्त्र पार्टीका सभापति रवि लामिछाने पनि काठमाडौँ–३ को उपत्यका खानेपानी लिमिटेडको महाँकालचौर केन्द्रमा मतदान गरेर स्थलमार्ग हुँदै चितवन पुगेका छन्।
उनी क्षेत्र चितवन–२ का उम्मेदवार हुन्। रवि आफ्नो निर्वाचन क्षेत्रमा पुग्ने कार्यक्रम बनाएका छन्। प्रचण्ड र गगन हेलिबाटै निर्वाचन क्षेत्र पुग्दा रास्वपाकै वरिष्ठ नेता बालेन्द्र शाहको हेलिकप्टर यात्रा भने रोकिएको छ । विहानै सिनामंगलस्थित अन्नपूर्ण इङ्लिस स्कुलमा रहेको मतदान केन्द्रबाट मत खसालेर उनी झापाका लागि निस्किएका थिए ।
तर उनी सवार हेलिकप्टर बीच आकाशबाटै काठमाडौ फर्काइएको छ । सुरक्षाका कारण भन्दै बीचबाटै हेलि फकाइएको बालेनको सचिवालयले जनाएको छ । कोशी प्रहरी कार्यालयले भने मौसमका कारण हेलिकप्टर अवतरण गर्न नसकी फर्किएको बताएको छ ।
तर बालेनले हेलिबाट झापा ५ का मतदानस्थलको अवलोकन गर्ने सुचना पाएको भन्दै कोशी प्रदेशका मुख्यमन्त्रीले गुनासो गरेपछि बालेनको हेलि बीचबाटै फर्काईएको बुझिएको छ। एता बालेनसँगै प्रतिस्पर्धामा रहेका नेकपा एमालेका अध्यक्ष केपी शर्मा ओलीले पनि भक्तपुर क्षेत्र नम्बर २ मा पर्ने सूर्यविनायक नगरपालिका बालकोटस्थित महेन्द्र शान्ति विद्यालयको केन्द्रबाट मतदान गरेका छन् ।
ओली प्रतिनिधिसभा निर्वाचनमा झापा ५ बाट उम्मेदवार छन्। मतदानपछि ओली आफू उम्मेदवार रहेको झापा ५ मा जाने कार्यक्रम थियो। तर, त्यसलाई स्थगित गरेर ओली भक्तपुरको गुण्डुमै बसेका एमालेका केन्द्रीय सचिव एवं कोशी प्रदेशका मुख्यमन्त्री हिक्मत कार्कीले जानकारी दिए।
बालेनको हेलि रोकिएपछि ओलीको समेत झापा जाने कार्यक्रम रोकिएको हो । बालेन हेली एभरेस्टको नाइन एन एओबी (काठमाडौं–झापा) उडानमार्फत् बालेनसहितको पाँच सदस्यीय टोली बिहान ०९ः१२ बजे झापा प्रस्थान गरेको थियो । तर, हेलिकप्टर डाइभर्ट भएर त्रिभुवन अन्तर्राष्ट्रिय विमानस्थलमै १०ः१० बजे अवतरण भएको छ ।
उता बिहीबार नै हेलिकप्टर चार्टर गरेर नेकपा एमालेका अध्यक्ष केपी शर्मा ओली पनि झापा ५ आउने कार्यक्रम स्थगित भएको छ । बालेनको सचिवालयका एक सदस्यले भने एमालेले आत्तिएर बालेनलाई रोकेको बताएका छन्।
‘बालेन दाइ झापा आएपछि प्रभाव पार्ने डरले एमालेका नेताहरू आत्तिएर रोक्न खोजिएको हो। जतिसुकै रोके पनि रोकिने अवस्था छैन’, उनले भने, ‘हामीले हेलिकप्टरमार्फत् मतदान केन्द्रको अवलोकन गर्ने भनेका थिएनौँ। त्यस्तो मान्यता हामीमा थिएन। उहाँ हेलिकप्टरबाट झापा आएर गाडीमार्फत अवलोकन गर्ने योजना थियो ।’
बालेन हेलिकप्टरबाट आउने भएपछि झापा प्रहरी प्रमुख र प्रमुख जिल्ला अधिकारीले माथिल्लो निकायमा खबर गरेका थिए । यसबारे कोशीका मुख्यमन्त्री हिक्मत कार्कीले गृहमन्त्री ओमप्रकाश अर्याल, प्रधानमन्त्री सुशीला कार्की र निर्वाचन आयोगका कार्यवाहक प्रमुख रामप्रसाद भण्डारीलाई जानकारी गराएपछि बालेनको हेलिकप्टर चार्टर्ड उडान बाटैबाट फिर्ता भएको हो ।
