विराटनगर, फागुन ८
कांग्रेस सभापति शेरबहादुर देउवा नेतृत्वको सरकारले गरेको निर्णय उल्टाउँदै प्रधानमन्त्री केपी शर्मा ओली नेतृत्वको सरकारले सिफारिस गरेका तीनजनालाई राष्ट्रपति विद्यादेवी भण्डारीले राष्ट्रियसभा सदस्यमा मनोनीत गरेकीछन् ।
आज बिहान प्रधानमन्त्री निवास बालुवाटारमा बसेको मन्त्रिपरिसदको बैठकले पूर्ववर्ती सरकारले गरेको निर्णय उल्टाउँदै नयाँ ३ जनाको नाम सिफारिस गरेको थियो । बैठकले युवराज खतिवडा, रामनारायण बिडारी र विमला पौडेल राईलाई राष्ट्रियसभा सदस्यमा सिफारिस गरेको बैठकपछि महिला बालबालिका तथा समाज कल्याणमन्त्री थममाया थापाले जानकारी दिइन् ।
आज सिफारिसमा परेका डा. खतिवडा राष्ट्र बैंकका पूर्व गभर्नर एवं राष्ट्रिय योजना आयोगमा दुईपटकसम्म उपाध्यक्ष भइसकेका छन् ।
अर्का सदस्य बिडारी माओबादी केन्द्रबाट संबिधानसभामा सदस्य रही सकेका माओबादी केन्द्रका अध्यक्ष पुष्पकमल दाहाल निकट कानून ब्यबसायी हुन् ।
राई एमाले बुद्धिजीवि संगठनमा काम गरी सकेकी नेतृ हुन् । राई राष्ट्रिय योजना आयोगको सदस्य पनि रहीसकेकी छन् ।
