२९ कात्तिक, काठमाडौं । उर्जा जलस्रोत तथा सिचाईमन्त्री वर्षमान पुन देशभरी विद्युत आपूर्तिको अवस्थाका बारेमा निरीक्षणगर्न नेपाल विद्युत प्राधिकरणको स्युचाटारस्थित भार प्रेषण केन्द्र पुगेका छन् ।
लक्ष्मीपूजाको दिन देशभरी सबैभन्दा बढी विद्युत खपत हुने समय भएकाले त्यसको व्यवस्थापनका विषयमा जानकारी लिन मन्त्री पुन भार प्रेषण केन्द्र पुगेका हुन । देशभरीको विद्युत खपतको अवस्था कस्तो छ भन्ने विषयमा अनुगमन गर्न भार प्रेषण केन्द्र पुगेको उनले बताए । उनले भने, ‘देशभरी कसरी व्यवस्थापन भइरहेको छ भन्ने कुराको जानकारी लिन आएको हुँ । देशभरीको केन्द्र भएकाले विद्युतको खपत कसरी भइरहेको छ । देशभरी तिहारको रमाइलो कस्तो छ भन्ने कुराको जानकारी लिन आएको हुँ ।’ प्राधिकरणका कायममुकायम कार्यकारी निर्देशक हितेन्द्रदेव शाक्यले यो वर्ष बढीमा ११ सय मेगावाट विद्युत खपत हुने बताए । लक्ष्मीपूजाको दिन अरु दिनभन्दा बढी विद्युत खपत हुने गरेको भएपनि कोभिडका कारण यो वर्ष बढीमा ११ सय १० मेगावाट मात्रै खपत हुने अनुमान प्राधिकरण गरेको उनले बताए । अहिले २ सय मेगावाट रिजर्भमा राखिएको पनि उनले बताए । उनले भने, ‘लक्ष्मीपूजाको दिन आज ११ सयभन्दा केही बढी खपत हुने अनुमान गरिएको छ । विगत वर्षहरुभन्दा यो काम हो । कोभिडको असरले पनि कम भएको हुन सक्छ ।’ शाक्यले अब देशभरी कुनै पनि प्रकारको लोडसेडिङ हुने अवस्था नभएको उल्लेख गर्दै गुणस्तर बढाउन र निर्माणको काम गर्दा केही समय समस्या आउन सक्ने बताए । तर नो लाइटमा समस्या आउने वित्तिकै सम्बोधनका लागि प्राधिकरणको टीम फिल्डमा जाने उनको भनाइ छ ।
उपत्यकासहित देशका मुख्य सहरी क्षेत्रमा झिलीमिली बत्तीका कारण लक्ष्मी पूजाको समयमा विद्युत् माग अत्यधिक हुन्छ । भार प्रेषण केन्द्रले देशभरको विद्युत् आपूर्ति, माग र वितरणको व्यवस्थापनको काम गर्छ । अत्याधुनिक प्रविधि जडित केन्द्रबाट प्राधिकरण र निजी क्षेत्रको कुन विद्युत् गृहबाट कति विद्युत् उत्पादन भइरहेको छ, भारतबाट कति आयात भइरहेको छ र कुन क्षेत्रमा कति माग र आपूर्र्तित छ भन्नेबारे प्रत्यक्ष डाटा हेर्न सकिन्छ ।
