८ भदाै, भक्तपुर ।
राष्ट्रिय परीक्षा बोर्डले कोभिड सङ्क्रमणको जोखिम रहेको भन्दै स्थगित गरेको कक्षा १२ को परीक्षा भौतिक उपस्थितिमै लिने तयारी गरेको छ ।
परीक्षा बोर्डका सदस्य–सचिव दुर्गा अर्यालले परीक्षा दिने विद्यार्थीलाई खोप लगाई सके लगत्तै १५ दिनअघि सूचना प्रकाशित गरी परीक्षा सञ्चालन गरिने बताए ।
सबै विद्यार्थीले खोप लगाए लगत्तै भौतिक उपस्थितिमै स्वास्थ्य मन्त्रालयको सल्लाहका आधारमा दसैँअघि नै वा दसैँलगत्तै पछि परीक्षा लिने तयारी गरेका उनले बताए ।
उनले अहिले सबै जिल्लामा परिपत्र गरेर कक्षा १२ को परीक्षा दिने विद्यार्थी पहिचान गरी खोप लगाउने व्यवस्था भइरहेको जानकारी पनि दिए ।
सरकारले परीक्षामा सहभागी सबै विद्यार्थीलाई प्रवेश पत्रको आधारमा खोप लगाउने निर्णय गरेर विभिन्न खोप केन्द्रमा खोप लगाउने व्यवस्था गरेको छ ।
स्वास्थ्य मन्त्रालयले कोरोना संक्रमण पुन बढ्दै गएको उल्लेख गर्दै सबै तहको परीक्षा स्थगित गर्न सीसीएमसीलाई प्रस्ताव गरेपछि सोही प्रस्तावका आधारमा सीसीएमसीले बोर्डलाई परीक्षाको मिति पछि सार्न निर्देशन दिएको थियो ।
साउन ३१ गते देखि भदौ ९ सम्म हुने गरी तोकिएको परीक्षा सोही निर्देशन बमोजिम रोकिएर बढेको अन्यौलतासँगै तयारीमा बसेका ३ लाख ७४ हजार विद्यार्थीको उच्च शिक्षा अध्ययनमा समस्या भएको छ ।
