किशोर विश्वकर्मा
विराटनगर, असार ३१
नेपालकै चर्चित समता फाउण्डेसनद्धारा सञ्चालित समता स्कुल विराटनगरमा अध्यन गरी माध्यामिक शिक्षा परीक्षा एसईई दिएका विद्यार्थीहरुको भविष्यमाथि खेलवाड गरिएको खुलासा भएको छ ।
विद्यार्थीलाई न्यूनतम शुल्कमा गुणस्तरीय शिक्षा प्रदान गर्दै आएको सो स्कुलमा अध्ययन गरी एसईई परीक्षा दिएका १९ जना विद्यार्थीको भविष्य माथि खेलवाड गरिएको खुलासा भएको हो ।
सो विद्यालयमा १० कक्षासम्म अध्ययन गरी माध्यमिक शिक्षा परीक्षा (एसईई)को रजिस्टे«सन फारम १९ जन विद्यार्थीले भरेका थिए । तर, परीक्षाको समयमा समता फाउण्डेसनले आफुहरुलाई परीक्षा दिनबाट झण्डै बञ्चित गरेको र पछि सम्पूर्ण १९ जना विद्यार्थीलाई स्कुलले जसोतसो अन्य विद्यालयको नामबाट परीक्षा दिने व्यवस्था मिलाएको विराटनगर–१ की छात्रा आर्या रिमालले बताइन् ।
उनले आफुहरुले समता फाउण्डेसनद्धारा सञ्चालित समता स्कुलबाटै रजिस्ट्रेसन फारम भरेको र फाउण्डेसन अन्तर्गतकै विद्यार्थी भएर परीक्षा दिन पाउनुपर्ने भएपनि काठमाण्डौंको सञ्जीवनी बैकप्पिक विद्यालयको नामबाट परीक्षा दिन लगाएको आरोप लगाइन् ।
उनले भनिन् ‘ हामी समता स्कुल विराटनगरका विद्यार्थी हौँ । सोही स्कुलबाट एसईईको परीक्षाको रजिस्ट्रेसन फारम भरेका थियौँ । हामी भन्दा अगाडिको ब्याचको परीक्षा फारम पनि समता स्कुलबाटै भरिने गरेको थियो फाउण्डेसनलेनै परीक्षाका सम्पूर्ण प्रकृया मिलाउने गरेको भएपनि हामीले यस पल्टको एसईई परिक्षा दिने समयमा रुवाबासीनै भएको थियो ।’
उनले सुरुमा समता फाउण्डेसनले आफुहरुको रजिस्टे«सन फारम हराएको बताउँदै यो वर्ष तिमीहरुले परीक्षा नदेउ अर्को बर्ष परिक्षा दिए छात्राबासमा राखेर १ वर्ष सम्म खाने बस्ने सुविद्या सहित निशुल्क कोचिङ क्लास समेत दिने व्यवस्था मिलाउँछौँ भन्ने सम्मको प्रलोभन देखाएको र आफुहरुको विरोध पछि बल्ल परीक्षा दिने व्यवस्था मिलाएको दावी गरिन् ।
उनले भनिन् ‘ विद्यार्थी हामी समता स्कुलका तर प्रवेश परिक्षामा विद्यालयको नाम सञ्जीवनी बैकल्पिक विद्यालय रहेको थियो । परीक्षा केन्द्र काठमाडौंकै लब्लि एन्जल स्कुलमा कायम गरिएको थियो । परीक्षा सकिएपछि हामी सबै विद्यार्थीको प्रवेश पत्र समेत समता फाउण्डेसनलेनै खोसेर लियो ।’
अर्की छात्रा सबनम राजवंशीले पनि परीक्षा दिने समय आफुहरुलाई विभिन्न आशंका उब्जिएको बताइन् । तर, परीक्षा दिन पाएपनि परिक्षा लगत्तै समता फाउण्डेसनबाट खटिएका व्यक्तिहरुले प्रवेश पत्र लगेको बताइन् ।
उनले परिक्षा दिएपनि नतिजा हेर्दा आफुहरु अचम्ममा परेको बताइन् । छात्रा राजवंशीले सिम्बोल नम्बर र जन्म मितिका आधारमा इन्टरनेटमा नतिजा हेर्दा गम्भिर त्रुटी भेटिएको दावी गरिन् ।
उनले भनिन् ‘ रिजल्ट आएपछि सिम्बोल नम्बर र जन्म मितिको आधारमा हेर्दा मैले पढेको विषय अर्कै थियो तर रिजल्टमा अर्कै देखाएको थियो । ऐच्छिक गणित विषयको परिक्षा दिएको भएपनि कम्प्यूटर साइन्सको नतिजा आएको थियो । मेरो मात्र होइन हामी सबैको त्यस्तै त्रुटि पाइएको थियो ।’
उनले वास्तविक रिजल्ट र ग्रेड सिटका लागि विद्यालयमा पटक पटक धाएपनि एक दुइदिनमा हुन्छ भन्दै टार्ने गरेको बताइन् । उनले भनिन् ‘ रिजल्ट आएको यत्रो समय भईसक्यो । कलेजहरुमा अब हाम्रो एडमिशन समेत हुने सम्भावना कम छ । मौका परिक्षाको अबधि समेत सकिई सकेको अवस्था छ । ग्रेड सिट नपाएर हाम्रो भविष्य माथि खेलवाड भएको छ । दोषि माथि तत्काल कारवाहि गरिनु पर्छ ।’
विद्यार्थीका अभिभावकहरुले पनि परिक्षाको नतिजा सार्जजनिक भएको लामो समय सम्म पनि ग्रेड सिट नदिएको प्रति आक्रोश पोखेका छन् । उनीहरुले कलेजहरुको एडमिसन समय पनि लगभग सकिन लागेको, मौका परिक्षाको समय सकिईसकेको र सिटिइभिटिले लिने प्रवेश परिक्षाको फारम भर्ने म्याद सकिन लागेपनि विद्यार्थीले वास्तविक नतिजा, ग्रेड सिट तथा सर्टिफिकेट नपाएको भन्दै स्कुल परिसरमै पुगेर आक्रोश व्यक्त गरे ।
अभिभावक भगिरथ पौडेलले भने ‘ ग्रेड सिट नदिएर विद्यार्थीको भविष्य माथि विद्यालय प्रशासनले खेलवाड गरेको छ । यदि विद्यार्थीले यहि कारण उच्च शिक्षा अध्यनमा असर परेको छ । उनले प्रश्न गरे यसरी विद्यार्थीको भविष्य माथि खेलवाढ गर्न पाइन्छ ? यसको जिम्मेवारी समता फाउडेसनले वा स्कुलले लिनु पर्छ कि पर्दैन ?’
यता स्कुलका प्रधानाध्यापक विकास गुरुङले भने विद्यार्थीको फारम समता स्कुलबाटै भरिएको दावी गरे । उनले समता स्कुल विराटनगरलाई कक्षा ८ सम्मको मात्र इजाजत भएको तथा इसईई परिक्षाका लागि समता फाउण्डेसनलेनै सञ्चालन गर्ने विद्यालयबाटै परिक्षा दिने व्यवस्था यसअघि हुँदै आएकाले स्थापना कालदेखि कुनै समस्या नभएको भएपनि यो वर्ष केही ढिलाइ र त्रुटी हुन पुगेको स्वीकार गरे ।
उनले आफुले केन्द्रमा(समता फाउण्डेसन) ग्रेड सिटका विषयमा कुरा राख्दा एक दुइदिन मित्रमा पठाइने भनिएको बताए । उनले विद्यार्थीको परीक्षाका लागि स्कुलले कुनै त्रुटि नगरेको दावी गरे ।
समता फाउण्डेसन एक गैर सरकारी संस्था हो । जसले देशैभर सामाजिक कार्य गर्दै आएको छ । समता फाउण्डेशनले देशभर ७३ जिल्लामा यस्ता विद्यालय सञ्चालन गर्दै आईरहेको छ । ति विद्यालयले मासिक १ सय रुपैयाँ मात्र विद्यार्थीहरु सँग शुल्क लिँदै अध्यापन गराउँदै आएका छन् ।
