७ चैत्र, रुकुम ।
अर्थमन्त्री जनार्दन शर्माले अवैध डिजिटल कारोबार मौलाएको बताएका छन्।
रुकुममा पत्रकारहरुसँग कुरा गर्दै मन्त्री शर्माले दैनिक ५० करोड रुपैंया बराबरको रकम अवैध रुपमा विदेशिन थालेको भन्दै सरकार सबै शक्ति लगाएर अवैध डिजिटल कारोबार रोक्न लागिपरेको जानकारी दिए।
डिजिटल कारोबार सम्बन्धी अध्ययन गर्न अर्थमन्त्रालयले सहसचिव भुपाल बरालको नेतृत्वमा एक समिति बनाएको छ। समितिले विभिन्न पक्षको अध्ययन गर्दै प्रतिवेदन अन्तिम चरणमा पुर्याएको छ।
कार्यक्रममा मन्त्री शर्माले अर्थमन्त्रालय बजेट निर्माणमा केन्द्रित हुन थालेको र कृषिलाई पहिलो प्राथमिकतामा राखेर कार्यक्रम बनाउन शुरु गरेको समेत बताएका छन्।
मन्त्री शर्माले भने आगामी आर्थिक वर्ष २०७९–७८ को बजेटमा कृषि क्षेत्रलाई पहिलो प्राथमिकततामा राख्ने गरी छलफल अघि बढाएका छौं, ‘आयात प्रतिस्थापन गर्ने र निर्यात वृद्धि गर्ने सवालमा कृषि क्षेत्रले धेरै मद्त गर्ने विश्वास छ ।’
कूल बैदेशिक व्यापारमा माघ मसान्तसम्म निर्यातको हिस्सा १० प्रतिशत नाघेको बताउँदै मन्त्री शर्माले आगामी आर्थिक वर्षदेखि प्रत्येक वर्ष निर्यातको हिस्सा १० प्रतिशतका दरले बढाउँदै लैजाने लक्ष्य राखिने बताए ।
उनले प्रमुख शहरसँग ग्रामीण क्षेत्रको दुरी घटाउने गरी पूर्वाधार विकास गर्नेतर्फ पनि बजेटले ध्यान दिने बताए । ‘एउटा शहरबाट अर्को शहरको दुरी घटाउने योजना बनाएका छौं । उदाहरणका लागि काठमाडौंबाट पोखराको सडक दुरी २ घण्टा कायम गराउने गरी योजना बनाइरहेका छौं । अन्यत्र पनि यस्तै योजना बनाउँदैछौं।’–उनले भने।
उनले जनतामा आधारित बिकास मोडललाई समेत बजेटमार्फत कार्यान्वयन गर्ने बताए। उनले अन्तर्राष्ट्रिय बजारमा पेट्रोलियम, सुन–चाँदी, खानेतेल, प्लास्टिक, डण्डी तथा डण्डीजन्य बस्तु, ढुवानीमा प्रयोग हुने पानीजहाज तथा कन्टेनरको भाँडादरलगायतको मूल्य श्रृङ्खलामा भएको वृद्धिले नेपालमा समेत मूल्यवृद्धिमा चाप परिरहेको बताए। यद्यपी, मूल्यवृद्धिका लागि राखिएको वार्षिक लक्ष्यको बाञ्छित सीमा भित्रै रहेकाले अत्तालिनुपर्ने स्थिति नरहेको उनको भनाई थियो।
शोधानान्तर घाटालाई बिस्तारै सुधार गर्दै लगेको तथा तरलता अभाव केही दिन भित्रै समाधानउन्मुख भएकाले अर्थतन्त्र बिस्तारै लयमा आउने विश्वास पनि अर्थमन्त्री शर्माले व्यक्त गरे।
