२३ साउन,काठमाण्डौ ।
सामाजिक अभियन्ता बन्दै राजनीतिमा प्रवेश गरेका राष्ट्रिय प्रजातन्त्र पार्टीका प्रवक्ता ज्ञानेन्द्र शाही जुम्लाबाट अगामी प्रतिनिधिसभा निर्वाचन लड्ने भएका छन् । त्यसबारे औपचारिक जानकारी दिन उनले आज पत्रकार सम्मेलन गर्दैछन् ।
आफूलाई समर्थकहरूबाट काठमाडौं २ र वा चितवन ३ बाट चुनाव लड्न सुझाव आएको तर आफूले जन्मभूमि जुम्लालाई रोजेको शाहीले बताएका छन् । उनी जुम्लाको सिंजा गाउँपालिका वडानम्बर ३ निवासी हुन् । एक मात्र निर्वाचन क्षेत्र रहेको जुम्लाबाट २०७४ मा माओवादी केन्द्रका गजेन्द्र महत ‘कार्मा’ निर्वाचित भएका थिए ।
अहिले पनि माओवादीबाट महत र कर्णाली प्रदेशका गृहमन्त्री भइसकेका नरेश भण्डारीको चर्चा रहेको छ । शाहीकै अनुसार पनि जुम्लामा राप्रपा निकै कमजोर छ । गत ३० वैशाखमा सम्पन्न स्थानीय तह निर्वाचनको मतपरिणाम अनुसार जिल्लाभरीमा राप्रपाको वडागत मत ५ सय १४ मात्र छ ।
त्यहाँ कांग्रेसको मत १६ हजार ७५, माओवादीको १४ हजार १७५, एमालेको ६ हजार ९६५ र नेकपा एकीकृतको ६ हजार १९५ रहेको छ । ०७४ को प्रतिनिधिसभा निर्वाचनमा तत्कालिन एकीकृत राष्ट्रिय प्रजातन्त्र पार्टी (राष्ट्रवादी) का तर्फबाट विन बुढाले उम्मेदवारी दिएका थिए ।
उनले ३८० मतमात्र प्राप्त गरेका थिए । माओवादी केन्द्रबाट निर्वाचित गजेन्द्रबहादुर महतले २२ हजार १ सय ७३ मत ल्याएका थिए । शाहीको वडामा राप्रपाले १६ मत ल्याएको छ । पार्टीको यस्तो कमजोर स्थानमा पनि आफ्नो जन्मभूमि भएकाले यहीबाट चुनाव लड्ने शाहीले बताएका छन् ।
उनी जुम्ली जनताले हराए पनि जिताए पनि त्यसलाई स्वीकार्ने बताउँछन् । शाही २०७८ फागुन ६ गते राप्रपामा प्रवेश गरेका थिए । पार्टी सुशासन विभागका प्रमुखसमेत रहेका शाही महामन्त्री धवल शमशेर राणाको नेतृत्वमा गठित समितिको प्रस्तावमा राप्रपा प्रवेश गरेका थिए ।
राप्रपा प्रवेश अघि शाहीले आफूलाई भ्रष्टाचारविरोधी अभियन्ताका रुपमा चिनाएका थिए । राप्रपा प्रवेश अघि नै उनीमाथि राजावादी भएको समेत आरोप लाग्ने गरेको थियो । पछि त्यही आरोपलाई पुष्टि गर्ने गरी उनी राजतन्त्र पुनस्थापनाको मुल एजेन्डा बोकेको राष्ट्रिय प्रजातन्त्र पार्टीमा प्रवेश गरेका थिए ।
