८माघ, एजेन्सी ।
विश्वकै सबैभन्दा ठूलो प्रजातान्त्रिक मुलुक अमेरिकामा कानून कति कडा छ र कानूनको नजरमा सर्वसाधारणदेखि राष्ट्रपतिसम्म सबै समान छन् भन्ने उदाहरण पछिल्ला केही घटनाक्रमहरुले थप पुष्टि गरेको छ । त्यहाँको न्यान विभागले लगातार राष्ट्रपतिहरुको घरमा छापा मारेको छ ।
पछिल्लो पटक अमेरिकी राष्ट्रपति जो बाइडेनको निवासमा अमेरिकी न्याय विभागले छापा मारेको हो । लामो तलासीपछि बाइडेनको डेलावेरको वेलमिङटनस्थित घरबाट थप छ गोप्य दस्ताबेज अमेरिकी अधिकारीहरूले जफत गरेका छन् ।
अलजजिराका अनुसार गोप्य दस्ताबेज जफत भएको बाइडेनका वकिल बोब बाउरले पुष्टि गरेका छन् । डेलावेर क्षेत्रबाट बाइडेन सन १९७३ देखि २००९ सम्म सेनिटर भएका थिए । उक्त घरबाट ओबामा कालमा उपराष्ट्रपति हुँदाका २००९ देखि २०१७ सम्मका गोप्य दस्ताबेज पनि भेटिएको बताइएको छ ।
शुक्रवार अमेरिकी न्याय विभागका अधिकारीहरूले १३ घण्टा खानतलासी गरेर गोप्य दस्ताबेज जफत गरेका थिए । वकिल बोब बाउरका अनुसार व्यक्तिगत रूपमा हस्तलिखित नोट तथा अन्य आसपासका सामग्रीहरु पनि जफत गरिएको छ । उक्त समयमा राष्ट्रपति र उनकी श्रीमती भने उपस्थित नभएको जनाइएको छ ।
यसअघि पनि उनको घरबाट गोप्य कागजातहरू फेला पारिएको थियो । कागजातको अनुसन्धानपछि थप प्रक्रियाहरू अघि बढ्ने जनाइएको छ । यसअघि पूर्व राष्ट्रपति डोनाल्ड ट्रम्पको घर तथा कार्यालयमा पनि छापा मारिएको थियो । यस्तै ट्रम्पलाई बिहीबार अमेरिकी जिल्ला न्यायाधीशले करिब १० लाख डलर जरिवाना लगाएका छन् ।
ट्रम्पले हिलारी क्लिन्टनविरुद्ध ७० मिलियन डलर क्षतिपूर्तिको माग गर्दै मानहानीको मुद्दा दायर गरेका थिए । अदालतले हिलारी क्लिन्टन र अन्य विरुद्ध दायर गरिएको मानहानीको मुद्दालाई ’व्यर्थ’ भन्दै ट्रम्पले कानूनी प्रक्रियाको दुरुपयोग गरेको आरोप पनि लगाएको छ ।
