१४ फागुन,एजेन्सी ।
आर्थिक समृद्धि र विकास पछिल्ला केही वर्षयता राजनीतिक नेतृत्वको आश्वासन र त्यसलाई पछ्याउदै जनताले देखेको एक सपना हो । पछिल्लो समय देशका ठूला राजनीतिक दलहरु बीच देखिएको सत्तालिप्सा र अस्थिर चरित्रबाट जनताको मन भित्र भित्रै कुडिएका बेला निजी क्षेत्रको प्रयासमा जनताको अपेक्षा वमोजिमको सानै भएपनि राहतको खबर संचार भएको छ ।
प्रदेश १ मा विद्युतीय सवारीसाधन उत्पादन गर्न नेपाल र कोरियाका दुई कम्पनीबीच सम्झौता भएको छ । यो सम्झौता कार्यान्वयन भएमा देशको अस्थिर राजनीतिबाट वाक्क भएका सर्वसाधारणलाई पक्कै पनि खुशी प्रदान गर्नेछ । शनिबार दक्षिण कोरियामा भएको सम्झौतामा नेपालको एन के मोटर्स प्रा.लि. र कोरियाको एसडीके कम्पनी बिच सम्झौता भएको हो ।
सम्झौता पत्रमा एन के मोटर्सका अध्यक्ष टिकाराम पुरी र कोरियन कम्पनीका कार्यकारी अध्यक्ष डेइ की जङ्गले हस्ताक्षर गरेका छन् । एन के मोटर्सका प्रबन्ध निर्देशक टिआर ढकालको उपस्थितीमा भएको सम्झौता अनुसार करिब तीन अर्ब रुपैयाँको द्धिपक्षीय लगानीमा कोरियन प्रविधिमा आधारित विभिन्न विद्युतीय सवारीसाधन उत्पादन गरिने छ ।
उद्योग स्थापना नेपालको प्रदेश १ भित्रकै उपयुक्त स्थानमा गरिने जानकारी दिँदै एनके मोटर्स प्रा.लि.का अध्यक्ष पुरीले विद्यालय तथा कलेज बस र निजी तथा सार्वजनिक सवारिसाधनहरु यस कम्पनीले उत्पादन गर्ने बताएका छन् । उनका अनुसार यहि मार्चमा कोरियन कम्पनीको प्रतिनिधि मण्डलले नेपाल भ्रमण गरि उद्योग स्थापनाका लागि उपयुक्त स्थानको छनौट गरिनेछ भने एक वर्षभित्र नै उत्पादनहरु बजारमा पठाउने लक्ष्य राखिएको छ ।
उनले नेपालमा विद्युतीय सवारीसाधनको माग बढ्दै गएका बेला प्रदेशभित्र नै यस्ता सवारी साधनको उत्पादन गर्नका लागि यो प्रयास थालिएको भन्दै यसकालागि प्रदेश सरकारसँग पनि आवश्यक समन्वय गरिने बताएका छन् । एसडीके कम्पनीले विश्वका विभिन्न देशहरुमा ठूला सवारीका महत्वपूर्ण पार्टपूर्जाहरु निर्यात गर्दै आएको छ ।
कम्पनीको भल्भो, हुन्डाई तथा डोसान कम्पनीमा प्राविधिक हिसेदारी रहेको छ । नेपालमा गत वर्षको तुलनामा चालु आर्थिक वर्षको पहिलो ६ महिनामा ५०.८८ प्रतिशतले विद्युतीय सवारी साधान आयात बढेको भन्सार विभागले जनाएको छ । गत वर्ष पहिलो ६ महिनाको अवधिमा ३ अर्ब ५१ करोड ६० लाख २५ हजार रुपैयाँ बराबरको ४ हजार ५४ वटा आयात भएको थियो ।
चालु आर्थिक वर्ष ५ अर्ब ३० करोड ५० लाख ९ हजार रुपैयाँ बराबरको ५ हजार ५९७ वटा आयात भएको विभागको तथ्यांक छ । चालु आर्थिक वर्षको पहिलो ६ महिनामा ३७ करोड ५८ लाख ६४ हजार रुपैयाँ बराबरको ३ हजार ८४८ वटा तीन पाग्रें विद्युतिय सवारी साधन आयात भएको छ ।
सय किलोवाटसम्मको ४ अर्ब ७३ करोड ७८ लाख ७३ हजार रुपैयाँ बराबरको १ हजार ७०८ वटा कार, जिप, भ्यान आयात गरिएको हो । यस्तै केही साता अघि मात्रै विश्व बजारकै ठूलो मानिने कोरियाली कम्पनी साम्सुङ इलेक्ट्रोनिक्सले नेपालबाटै आफ्ना सामग्री उत्पादन थाल्ने बताएको थियो ।
आगामी मार्च महिनादेखि नेपालमै स्थापित फ्याक्ट्रीबाट आफ्नो उत्पादन थाल्ने तयारी गरेको छ । सामसुङ कम्पनीको नेपाल कार्यालयका प्रबन्ध निर्देशक पार्क सङ जुनले गएको माघ १७ गते परराष्ट्रमन्त्री डा. विमला राई पौडेललाई भेट गरी नेपालमै उत्पादन थाल्न लागिएको जानकारी गराएका थिए ।
परराष्ट्र मन्त्रालयमा भएको भेटमा उनले भैरहवामा सामसुङको ‘एसेम्बलिङ फ्याक्ट्री’ स्थापना भएको र मार्चदेखि पहिलो चरणमा सामसुङका टेलिभिजन सेटहरु उत्पादन हुने जानकारी दिएका थिए । कम्पनीले विस्तारै नेपालमा सामसुङका अन्य उत्पादनहरु फ्रिज, वासिङ मेसिनदेखि स्मार्ट फोनहरु पनि उत्पादन गर्ने प्रबन्ध निर्देशक पार्कले बताएका छन् । गोल्छा अर्गनाइजेशनसँग मिलेर सामसुङले सो उद्योग स्थापना गरेको छ ।
