५ साउन, एजेन्सी ।
उत्तर कोरियाले कोरियाली क्षेत्रमा अमेरिकाले एयरक्राफ्ट क्यारियर, बम्बर र मिसाइल सबमरिन ल्याएर उत्तेजक गतिविधि गरेमा आणविक हमला गर्ने चेतावनी दिएको छ । उत्तर कोरियाको आधिकारिक सरकारी मिडिया कोरियन सेन्ट्रल टेलिभिजनले बिहीबार त्यस्तो धम्की सार्वजनिक गरेको हो । उत्तर कोरियाले पटकपटकको चेतावनीपछि पनि जुलाई १८ मा दक्षिण कोरियामा आणविक बैठक गरेको भन्दै आक्रोश जनाएको छ।
बुधबार जापानी समुद्रमा दुई मिसाइल प्रहार गरेपछि उत्तर कोरियाको यस्तो आणविक धम्की आएको हो । आणविक सवालमा मात्रै होइन एक अमेरिकी सैनिक भागेर उत्तर कोरिया छिरेको विषयमा पनि उत्तर कोरिया र अमेरिकी तनाव देखिएको छ । अमेरिकी अधिकारीहरूले पटकपटक उत्तर कोरियाली अधिकारीहरूसँग कूटनीतिक सम्पर्क गर्न चाहे पनि उत्तर कोरियाले कुनै प्रतिक्रिया नदिएको अमेरिकी मिडियाहरूले उल्लेख गरेका छन् ।
केही दिनअगाडि अनुशासनको कारबाहीमा परेका अमेरिकी सैनिक त्रेभिस किङ गत मंगलबार उत्तर र दक्षिण कोरियाली सीमाबाट सुटुक्क भागेर उत्तर कोरिया पसेका थिए । दक्षिण कोरियाबाट अमेरिका उडान गर्नुअगाडि विमानस्थलको सुरक्षा जाँचबाट भागेका उनी दुई कोरियाको सीमा हुँदै उत्तर कोरिया छिरेका थिए ।
यसैबीच दक्षिण कोरियाली राष्ट्रपति युन सोक–योलले अमेरिकी आणविक पनडुब्बीमा सवार हुँदै उत्तर कोरियालाई धम्की दिएका छन्। उनले उत्तर कोरियाले आणविक हमला गरेमा उसको शासनको अन्त्य हुने बताए । अमेरिकी आणविक पनडुब्बी युएसएस केन्टकी अहिले दक्षिण कोरियाको भ्रमणमा छ ।
ओहायो–क्लास यूएसएस केन्टकीले उत्तर कोरियाको सम्पूर्ण हतियारभन्दा धेरै आणविक हतियार बोकेको छ। यो पनडुब्बी आणविक शक्ति हो। अमेरिकी आणविक पनडुब्बीको भ्रमण गरेपछि दक्षिण कोरियाली राष्ट्रपतिले अमेरिकाको सबैभन्दा महत्वपूर्ण आणविक रणनीतिक सम्पदा आफ्नै आँखाले देख्न पाउँदा खुसी लागेको बताएका छन् ।
उनले अहिलेको सबैभन्दा शक्तिशाली रणनीतिक सम्पदा मध्येको एक युएसएस केन्टकीको दक्षिण कोरिया भ्रमण अर्थपूर्ण र साँच्चै आश्वस्त भएको उनले बताएका छन् । हामीले स्पष्ट रूपमा चेतावनी दिएका छौं कि उत्तर कोरियाले आणविक उत्तेजनाको सपना देख्न सक्दैन र यदि त्यसो भयो भने, यसले शासनको अन्त्यको नेतृत्व गर्नेछ।
