१६ असोज, एजेन्सी ।
अमेरिकामा सभामुख केभिन म्याकार्थीलाई हटाउने अभियान सुरु भएको छ । एक सांसदले आफ्नै पार्टीका तर्फबाट प्रतिनिधिसभाको सभामुख बनेका केभिन म्याकार्थीलाई हटाउने प्रस्ताव सदनमा दर्ता गराएका छन् । रिपब्लिकन पार्टीभित्रको आन्तरिक तनावलाई यो कदमले सतहमा देखाएको छ ।
फ्लोरिडाका सांसद म्याट गेट्जले सभामुख म्याकार्थीलाई हटाउनका निम्ति सोमबार सदनमा प्रस्ताव अघि सारेका हुन् । संसद् भवनबाट बाहिरिने क्रममा सांसद गेट्जले भने, “मसँग पर्याप्त रिपब्लिकन छन् । अर्को हप्ता दुईमध्ये एउटा कुरा हुनेछ, या त केभिन म्याकार्थी सभामुख रहने छैनन् वा उनी डेमोर्क्याटको हितका लागि काम गर्ने सभामुख हुनेछन् ।”
त्यसको केही समयपछि सामाजिक सञ्जालमा म्याकार्थीले ‘प्रस्ताव अघि सार्न’ भन्दै चुनौतीपूर्ण टिप्पणी गरेका छन् । गेट्जले ‘भर्खरै गरेँ’ भन्दै प्रतिक्रिया दिएका छन् । डेमोर्क्याटको समर्थनमा सरकारी खर्च जुटाउन एक विधेयक पारित गरेपछि रिपब्लिकनभित्र सभामुख म्याकार्थीप्रति असन्तुष्टि बढेको छ । म्याकार्थीले डेमोक्र्याटिक पार्टीको समर्थनमा शटडाउनबाट बच्न खर्च विधेयक पारित गराएका थिए ।
यसो गरेर म्याकार्थीले आफ्नै पार्टीको निर्देशन उल्लंघन गरेको मानिन्छ । यसले पार्टीमा कडा अडान लिने रिपब्लिकन सदस्यहरू रिसाएका छन् । उनीहरुबीच गुटबन्दी पनि हुन थालेको छ । म्याकार्थीले आफ्नो विपक्षी डेमोक्र्याटिक पार्टीको सहयोगमा आफ्नो स्थिति बलियो बनाउने प्रयास गरेको भन्दै उनीहरूले उनलाई हटाउने प्रयासलाई तीब्र पारेका हुन् ।
अमेरिकी संसदको दुवै सदनमा कडा रिपब्लिकन सांसदहरूले शटडाउनबाट बच्न ल्याइएको विधेयकको विपक्षमा मतदान गरेका थिए । हाउस अफ रिप्रिजेन्टेटिभमा रिपब्लिकन सांसदको वर्चस्व छ भने सिनेटमा डेमोक्र्याटिक पार्टीको अलिकति अग्रता छ ।
यसअघि सभामुख म्याकार्थीले राष्ट्रपति जो बाइडेनलाई भ्रष्टाचारको आरोप लगाउँदै महाअभियोग लगाउन आह्वान गरेका थिए । म्याकार्थीले पत्रकार सम्मेलन गर्दै आफूले सदन र समितिलाई राष्ट्रपति बाइडेनमाथि औपचारिक महाअभियोग अनुसन्धान गर्न निर्देशन दिएका थिए । हाउस ओभरसाइट कमिटीको अनुसन्धानले बाइडेन परिवारले भ्रष्टाचार गरेको फेला परेको उनले बताएका छन् ।
