९ साउन, एजेन्सी ।
विश्वकै सबैभन्दा धनी व्यक्ति एलन मस्कको कम्पनी टेस्लाले अर्को वर्षदेखि रोबोट मानवको उत्पादन र प्रयोग शुरु गर्ने भएको छ । मस्कले सामाजिक सञ्जाल ’एक्स’ बाट अर्को वर्षदेखि रोबोट मानवको उत्पादन र प्रयोग गर्ने जानकारी दिएका हुन् ।
यस्ता रोबोटहरू पहिला टेस्लाले प्रयोग गर्ने, दुई वर्षपछि अर्थात् सन् २०२६ मा मात्रै अरू कम्पनीलाई बेच्न शुरु गरिने मस्कले बताए । यो वर्षदेखि टेस्लाको कारखानामा यस्ता रोबोटको प्रयोग गर्ने योजना भए पनि ढिलाइ भएको खबरमा उल्लेख छ ।
मस्कले यसअघि यस्ता रोबोटहरू २० हजार डलरमा बेच्ने घोषणा गरे पनि अहिले भने मूल्य सार्वजनिक भइसकेको छैन । यी रोबोटले मानिसले जस्तै काम गर्न सक्नेछन् ।
’होन्डा’ र ’बोस्टन डाइनामिक्स’ लगायतका अन्य कम्पनीहरूले पनि आफ्नै रोबोट मानव विकास गरिरहेका छन् ।
