१६ साउन, विराटनगर ।
विराटनगरको अरनिको आवासीय माध्यमिक विद्यालयले उत्कृष्ट शैक्षिक संस्था सम्मान प्राप्त गर्न सफल भएको छ ।
चन्द्रलोक प्रतिष्ठान काठमाडौंले मंगलबार अरनिको आवासीय माध्यमिक विद्यालय विराटनगरलाई उत्कृष्ट शैक्षिक संस्था सम्मान २०८१ प्रदान गरेको हो ।
नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपाल, नेपाली कांग्रेसका नेता एवं प्रतिनिधि सभा सांसद अर्जुननसिंह केसी र प्रतिष्ठानका अध्यक्ष सिताराम कार्कीले अरनिको आवासीय माध्यमिक विद्यालयका प्रिन्सिपल राजेश कार्कीलाई उत्कृष्ट शैक्षिक संस्था सम्मान प्रदान गरेका हुन् ।
चन्द्रलोक प्रतिष्ठानका अध्यक्ष सिताराम कार्कीले २०३३ सालमा स्थापना भएको अरनिको आवासीय माध्यमिक विद्यालय कोशी प्रदेशको पहिलो र नेपालको ८औं उत्कृष्ट शैक्षिक संस्था बन्न सफलता प्राप्त गरेको र आगामी दिनमा प्रतिस्पर्धी शिक्षाको विकासका लागि देश भक्त, आदर्शवान र नैतिकवान् शैक्षिक जनशक्ति उत्पादनमा निरन्तर अग्रणी भूमिका निर्वाह गर्न सफल रहेस् भन्ने उद्देश्यका साथ उत्कृष्ट शैक्षिक संस्था सम्मान प्रदान गरेको बताए ।
केही साता अघि मात्रै अरनिकोले ‘प्रेष्टिजियस प्लस टु आउट अफ भ्याली अवार्ड’ प्राप्त गरेको थियो ।
केन्द्रबिन्दु डटकमले काठमाडौंमा आयोजना गरेको एक विशेष कार्यक्रमकाबीच गुणस्तरीय शिक्षा र उत्कृष्ट नतिजाका आधारमा अरनिको आवासीय माविले शिक्षा क्षेत्रमा पुर्याएको योगदानको उच्च सम्मान गर्दैै ‘प्रेष्टिजियस प्लस टु आउट अफ भ्याली अवार्ड’ प्रदान गरेको थियो ।
अरनिकोले कक्षा ११ र १२ मा विज्ञान, व्यस्थापन , कम्प्युटर साइन्स र होटल व्यवस्थापनका कक्षा सञ्चालन गर्दै आएको छ ।
यस विद्यालयले गौरवमय इतिहास रच्नुको पछाडि परिपक्क, अनुभवी, उत्तरदायी र दक्ष शिक्षक समूह मूल कडी रहेको समेत प्रेन्सिपल कार्कीले बताएका छन् ।
