३ भदौ , एजेन्सी ।
स्पेनिस ला लिगामा यस सिजनका लागि फ्रान्सका स्टार स्ट्राइकर किलियन एमबाप्पेको डेब्यु खराब रह्यो । गत साता भएको युइएफए सुपर कपमा भने एटलान्टालाई २–० ले पराजित गर्दै रियलले उपाधि जितेको खेलमा उनले रियल म्याड्रिडमा डेब्यु गरेका थिए । त्यो खेलमा भने एमबाप्पेले एक गोल गरेका थिए । तर ला लिगामा उनको जादु नचल्दा साविक विजेता रियल म्याड्रिड लिगाको पहिलो खेलमा मालोर्कासँग बराबरीमा रोकिएको छ ।
सोमबार मार्लोकाको घरेलु मैदानमा भएको खेलमा रियल १–१ को बराबरीमा रोकिएको हो । रियलका लागि रोड्रिगो र मार्लोकाका लागि वेदात मुरिकीले गोल गरे । १३औं मिनेटमा रोड्रिगोले गोल गर्दै रियललाई अग्रता दिलाएका थिए । ५३ औं मिनेटमा वेदात मुरिकीले गोल गर्दै मालोर्कालाई खेलमा फर्काए । इन्ज्युरी समयको अन्तिम मिनेटमा रियलका फ्रिल्यान्ड मेन्डिले रातो कार्ड पाएका थिए ।
यता इंग्लिस प्रिमियर लिग अन्तर्गत गएराति भएको खेलमा म्यानचेस्टर सिटीले चेल्सीलाई हराएको छ । गएको सिजनको विजेता म्यानचेस्टर सिटीले चेल्सीलाई हराउँदै नयाँ सिजनमा विजयी सुरुवात गरेको हो । चेल्सीको घरेलु मैदान स्टामफर्ड ब्रिजमा सिटीले २–० को जित प्राप्त गरेको हो । सिटीको लागि एर्लीङ हालान्ड र माटियो कोभाचिचले १–१ गोल गरे । सिटीले जितसँगै ३ अङ्क जोडेको छ ।
चेल्सीका लागि भने नयाँ सिजनको सुरुवात सुखद् रहन सकेन । चेल्सीले नयाँ सिजनका लागि ११ खेलाडी अनुबन्ध गर्ने क्रममा १ सय ८५ मिलियन पाउण्ड खर्च गरिसकेको छ । क्लबमा ४० सिनियर खेलाडी रहँदा अब अन्तिम २५ टोलीमा को रहन्छन् भन्ने चासोको साथ हेरिएको छ । सिटीले जितका साथ ३ अंक जोडेको छ । आइतबार नै ब्रेन्टफर्डले नयाँ सिजनमा विजयी सुरुवात गर्ने क्रममा क्रिस्टल प्यालेसलाई २–१ ले पराजित गरेको थियो । आज हुने खेलमा टोटेनहम ह्ट्सपर र लेस्टर सिटी खेल्नेछन् ।
