२१ भदौ, विराटनगर ।
चौथौ संस्करणको युरोपियन नेसन्स लिगअन्तर्गत पहिलो खेलमा पोर्चुगलले जित निकालेको छ । बिहीबार राति भएको नेसन्स लिगअन्तर्गत समूह चरणका खेलमा पोर्चुगलले क्रोएसियामाथि २-१ गोलको जित निकालेको हो ।
पोर्चुगलको राजधानी लिस्बनस्थित स्टेडियो डी बेन्फिकामा पोर्चुगललाई जिताउन कप्तान क्रिस्टियानो रोनाल्डो र डियोगो डालोटले एक-एक गोल गरे । क्रोएसियाले भने एउटा आत्मघाती गोल उपहारमा पाएको थियो ।
खेलको सातौं मिनेटमा डियोगोले गोल गर्दै पोर्चुगललाई सुरुआती अग्रता दिलाएका थिए । ३४औं मिनेटमा रोनाल्डोले गोल गरेपछि पोर्चुगलले २–० को अग्रता बनायो । तर, ४१औं मिनेटमा पोर्चुगलका डालोटले आफ्नै पोस्टमा आत्मघाती गोल गरेपछि पहिलो हाफमा खेल २–१ को अवस्थामा सकियो ।
त्यसपछि दोस्रो हाफमा दुवै टोलीबाट थप गोल नहुँदा खेलमा पोर्चुगल २–१ ले विजयी भयो ।
जितसँगै पोर्चुगलले तीन अंक जोड्दा रोनाल्डोले नयाँ कीर्तिमान बनाए । रोनाल्डो आफ्नो खेल क्यारियरकै ९०० गोलको कोसेढुंगा पार गरे । यो गोलसँगै ३९ वर्षीय रोनाल्डोको नाममा अन्तर्राष्ट्रिय पुरुष फुटबलमा १३१ गोलको कीर्तिमान बनेको छ ।
फुटबल क्यारियरमा क्लब र देशका लागि ९०० गोल गर्ने उनी पहिलो खेलाडीसमेत बनेका छन् ।
