२६ भदौ, काठमाडौं ।
राष्ट्रिय स्वतन्त्र पार्टी (रास्वपा) का सभापति रवि लामिछानेले प्रधानमन्त्री केपी शर्मा ओलीलाई भेटेर उपसभामुख हटाउनु घातक हुने बताएको जानकारी दिएका छन् । पूर्वगृहमन्त्री लामिछाने र प्रधानमन्त्री ओलीबीच मंगलबार साँझ भेटवार्ता भएको थियो ।
बुधबार सिंहदरबारमा बसेको सचिवालय बैठकपछि सभापति लामिछानले यसबारे जानकारटी दिएका हुन् । उनले जे गर्दै हुनुहुन्छ यो अत्यन्त गलत हुने भनेर ओलीलाई बताएको जानकारी दिए ।
उनले भने, ‘छलफल गर्न गएँ र उहाँलाई मैले भनेँ– गलत गर्दै हुनुहुन्छ । गर्दै हुनुहुन्छ भने गलत गर्दै हुनुहुन्छ । दुई तिहाइ सरकारका प्राथमिकता धेरै छैन । दुई तिहाइ भनेको शक्ति हो । त्यो शक्ति कहाँ प्रयोग गर्ने भनेर बुझ्नुहुन्छ होला । उहाँलाई सौहादपूर्ण रूपमा मैले गलत हुन्छ भनेँ । यसले जुन बाटोतर्फ, यदि सत्य हो भने जे सोचिरहनु भएको छ । अत्यन्त घातक हुन्छ।’
जबाफमा अध्यक्ष ओलीले छलफल गरिरहेको बताएका थिए । ‘उहाँको प्रतिक्रिया म छलफलमा छु, नेपाली कांग्रेससँग पनि छलफलमा छु भन्ने थियो,’ सभापति लामिछानेले भने ।
उपसभामुख मगरले काठमाडौंस्थित अमेरिकी दूतावासलाई आफूसहित ६ जनाको भिसाको अन्तर्वार्ताको समय मिलाइदिन लेखेको पत्र विवादमा परेको थियो । रास्वपाले पनि उपसभामुखले अन्तर्वार्ताका लागि दूतावासलाई हस्ताक्षरसहित अनुरोधपत्र दिनु गलत भएको स्वीकारेको छ । तथापि, १८ महिनापछि बदनीयतका साथ यतिबेला राजीनामा माग्ने र अविश्वासको प्रस्ताव ल्याउने काम भएको रास्वपाको ठहर छ ।
संसद सचिवालयसँग असम्बन्धित व्यक्तिलाई अमेरिका लैजान भिसा अन्तर्वार्ताको मिति तोक्न आग्रह गर्दै उपसभामुख रानामगरले पोहोर फागुनमा अमेरिकी दूतावासलाई पत्र लेखेकी थिइन् । अमेरिकी दूतावासलाई उनले लेखेको पत्रलाई लिएर सत्तारूढ दलहरूले उपसभामुखको पदीय गरिमा गिरेको भन्दै राजीनामा मागिरहेको छ ।
