१७ असोज ,एजेन्सी ।
अर्जेन्टिनी स्टार लिओनल मेसीले पहिलो हाफको इन्जुरी समयमा दुई गोल गर्दै फ्रेन्चाइज इतिहासमा पहिलो पटक इन्टर मियामीलाई सपोर्टर्स सिल्ड जिताएका छन् । बिहीबार बिहान भएको खेलमा मायामीले कोलम्बस क्रूलाई ३–२ ले पराजित गरेको हो ।
मियामीको जितमा लुइस सुआरेजले पनि एक गोल थपे । यो ट्रफीसँगै मेसीले क्लब र देशका लागि जितेको ट्रफीको संख्या ४६औं पुगेको छ । मियामीको साथ उनले जितेको भने यो दोस्रो उपाधि हो ।
खेलको ४५औं मिनेटमा मेसीले जोर्डी अल्बाको लामो पासमा गोल गर्दै मियामीलाई सुरुआती अग्रता दिलाएका थिए । पहिलो हाफको इन्जुरी समयको पाँचौं मिनेटमा मेसीले करिब ३० यार्ड टाढाबाट फ्रिकिकमा गोल गरे ।
दोस्रो हाफको पहिलो मिनेटमै डिएगो रोसीले गोल गर्दै कोलम्बसलाई खेलमा फर्काउने प्रयास गरेका थिए । तर, मियामीलाई दुई गोलको अग्रता लिन धेरै समय लागेन । त्यसको दुई मिनेटपछि नै सुआरेजले हेडरमार्फत गोल गर्दै मियामीको अग्रता ३–१ मा पु¥याए ।
६१औं मिनेटमा जुआन हर्नान्डेजले पेनाल्टीमा गोल गर्दै कोलम्बसलाई ३–२ को स्थितिमा ल्याए । तर, ६३ औं मिनेटमा रुडी कामाचो दोस्रो पहेंलो कार्ड खाँदै मैदानबाट बाहिरिएपछि कोलम्बस १० खेलाडीमा सिमित भयो ।
तर, त्यसले कोलम्बसलाई केही फरक परेन । कोलम्बसले अझै पनि स्ट्रेचमा केही ठूला अवसरहरू सिर्जना गरेको थियो । तर, गोल भने थप्न सकेन । यता युरोपेली च्याम्पियन्स लिग फुटबलमा रियल म्याड्रिड फ्रेन्च क्लब लिलेसँग पराजित भएको छ ।
गएराति सम्पन्न खेलमा लिलेले रियल म्याड्रिडलाई १–० गोल अन्तरले पराजित गरेको हो । लिलेको जीतमा जोनाथन डेभिडले खेलको पहिलो हाफको इन्जुरी समयमा पेनाल्टी मार्फत् गरेको गोल नै खेलको निर्णायक गोल बनेको थियो ।
लिलेले यस सिजनमा दोस्रो खेलमा पहिलो जीत हासिल गरेको छ । लिलेले २ खेलमा ३ अङ्क हासिल गरेको छ । रियल म्याड्रिडको पनि २ खेलमा ३ अङ्क रहेको छ । यस्तै गएराति नै भएको अर्को खेलमा एस्टन भिल्लाले बायर्न म्युनिखलाई १–० गोलले नै पराजित ग¥यो ।
एस्टनको जीतमा जे डुरानले खेलको ७९औँ मिनेटमा गरेको गोल नै निर्णायक बन्यो । जीतपछि दुई खेलमा अपराजित भिल्ला ६ अङ्कसहित तालिकाको छैठौँ स्थानमा छ । यस्तै अर्को खेलमा पोर्चुगिच क्लब बेन्फिकाले एट्लेटिको मड्रिडविरुद्ध सहज जित हात पारेको छ ।
घरेलु टोलीले भ्रमणाकारी स्पेनिस टोलीमाथि ४–० को सजिलो जित हात पारेको हो । लगातार दोस्रो जितसँगै ६ अंक पु¥याएको बेन्फिका तालिकामा तेस्रो स्थानमा छ । एट्लेटिको भने यो पहिलो हार हो ।
दुई खेलबाट तीन अंक जोडेको एट्लेटिको २३औं स्थानमा छ । यस्तै १० खेलाडीमा समेटिएको युभेन्ट्सले आरबी लाइजपजिगविरुद्ध कठिन जित हात पारेको छ । रेड बुल एरेनामा बुधबार राति भएको खेलमा भ्रमणकारी टोली युभेन्ट्सले घरेलु टोलीमाथि ३–२ को जित निकालेको हो।
जितसँगै दुई खेलमा ६ अंक पु¥याएको सिरी ए क्लब युभेन्ट्स सातौं स्थानमा उक्लिएको छ । दुवै खेलमा पराजित जर्मन क्लब लाइपजिग अंकविहीन रहँदै २९औं स्थानमा यथावत छ ।
लिभरपुलले भने च्याम्पियन्स लिगमा लगातार दोस्रो जित दर्ता गरेको छ । एनफिल्डमा बुधबार राति भएको खेलमा घरेलु टोलीले सिरी ए क्लब बोलोग्रालाई २–० ले पराजित गरेको हो ।
जितसँगै ६ अंक पु¥याएको लिभरपुल पाँचौं स्थानमा छ । भ्रमणकारी टोली भने एक अंकका साथ २६औं स्थानमा यथावत छ । लिभरपुलका लागि म्याक एलिस्टर र मोहम्मद सलाहले गोल गरेका थिए ।
एलिस्टरले ११ र सलाहले ६५औं मिनेटमा गोल गरेका हुन् ।
