१२ कार्तिक , एजेन्सी ।
दक्षिण अफ्रिकाका पूर्व क्रिकेटर एवं प्रशिक्षक गेरी किस्टनले पाकिस्तानको एकदिवसीय (ओडीआई) र टी–२० टोलीको मुख्य प्रशिक्षक पदबाट राजीनामा दिएका छन् । किस्टनलाई यस वर्षको अप्रिलमा दुई वर्षका लागि पाकिस्तान क्रिकेट बोर्ड (पीसीबी) ले नियुक्त गरेको थियो ।
तर, उनले मात्र ६ महिनामै आफ्नो पद त्याग गरेका छन् । किस्टनको राजीनामाले पाकिस्तानको अष्ट्रेलिया भ्रमणभन्दा एक हप्ता अघि विवाद र असन्तुष्टि देखिएको छ । पीसीबीले किस्टनको ठाउँमा टेस्ट टोलीका प्रशिक्षक जेसन गिलेस्पीलाई अस्ट्रेलिया भ्रमणको लागि प्रशिक्षक बनाउने निर्णय गरेको छ ।
पाकिस्तान क्रिकेट बोर्ड र नवनियुक्त प्रशिक्षकहरू किस्टन र गिलेस्पीबीच असन्तुष्टि बढ्दै गएको थियो । पीसीबीले दुवै प्रशिक्षकहरूलाई टोली चयनको अधिकारबाट बञ्चित गर्दै छुट्टै छनोट समितिलाई यस जिम्मेवारीमा राखेको थियो ।
गिलेस्पीले यस विषयमा खुलेर असन्तोष व्यक्त गरेका थिए र तेस्रो टेस्ट खेलअघि ‘म त अब केवल खेल विश्लेषक बनेको छु, जुन मैले सम्झौता गरेको थिएन’ भनेर प्रतिक्रिया दिएका थिए । किस्टनले यस विषयमा सार्वजनिक रूपमा केही टिप्पणी नगरे पनि उनी समेत यस निर्णयमा असन्तुष्ट रहेको बुझिएको छ ।
पाकिस्तानको नयाँ कप्तानको घोषणा र टिम चयनको प्रक्रियामा किस्टनको सुझावलाई बेवास्ता गरिएको थियो । नयाँ कप्तान मोहम्मद रिजवानको घोषणा प्रेस कन्फरेन्समा गर्दा बोर्ड अध्यक्ष मोहसिन नकवी, चयन समिति सदस्य आकिब जावेद र कप्तान र उपकप्तान सलमान आघा मात्र उपस्थित थिए, जबकि किर्स्टन देशमै थिएनन् ।
पाकिस्तानले इंग्ल्याण्डसँग पहिलो टेस्ट गुमाएपछि तेस्रो पटक तीन महिनामा नयाँ चयन समिति बनाइएको थियो। यस समितिमा आकिब जावेद, अलीम डार, अजहर अली, असद सफिक र हसन चीमा समावेश थिए ।
प्रशिक्षकहरू र कप्तानलाई टिम चयन प्रक्रियाबाट हटाइएको थियो । दोस्रो टेस्ट जित्नका लागि मुल्तानमा पुनः प्रयोग गरिएका पिच तयार गर्ने विचारको मूल योजनाकार अलीम डार रहेको बुझिएको थियो ।
किस्टनले आफ्नो ओडीआई कोचिङ क्षमता प्रदर्शन गर्न पाउनुअघि नै पद छोड्नुपर्ने अवस्थामा आइपुगे । पाकिस्तानले लामो समय लगाएर उच्चस्तरीय प्रशिक्षक खोजेपछि किस्टनको नियुक्ति गरेको थियो ।
जसले भारतलाई २८ वर्षमा पहिलो ओडीआई विश्वकप जिताएका थिए । किस्टनको पहिलो ठूलो प्रतियोगिता संयुक्त राज्य अमेरिकामा भएको टी–२० विश्वकप थियो, जसमा पाकिस्तानले अमेरिका र भारतसँग पराजय भोग्दै पहिलो चरणमै प्रतियोगिताबाट बाहिरिएको थियो ।
यस पराजयपछि बाबर आजमले दोस्रो पटक ह्वाइट–बल कप्तान पद छोडेका थिए । किस्टनलाई लामो समय दिएर टोली निर्माणको समय चाहिने बताइएको थियो, सन् २०२५ मा घरेलु आईसीसी च्याम्पियन्स ट्रफीका लागि ।
पाकिस्तानको अष्ट्रेलिया भ्रमणमा तीन ओडीआई र तीन टी–२० समावेश छन् । नोभेम्बर ४ मा मेलबर्नमा पहिलो ओडीआई खेलबाट सुरू हुँदैछ ।
