१६ मंसिर,काठमाण्डौ।
राष्ट्रिय स्वतन्त्र पार्टी (रास्वपा)का सभापति रवि लामिछानेलाई आज पनि बयानका लागि सरकारी वकिल कार्यालयमा लगिएको छ । स्वर्णलक्ष्मी बहुउद्देश्यीय सहकारी संस्थाको रकम अपचलनबारे शुक्रवारदेखि उनको बयान भइरहेको छ ।
उनलाई भद्रकाली स्थित जिल्ला सरकारी वकिलको कार्यालयमा उपस्थित गराइएको हो । शुक्रबार साढे ६ घण्टा बयान लिदा समेत नसकिएपछि आज पनि रविको बयान जारी राखिएको छ । रविका व्यापारिक साझेदार पूर्व डीआईजी छविलाल जोशीसँग सरकारी वकिल र अनुसन्धान अधिकृतहरूले बयान लिइसकेका छन् ।
स्वर्णलक्ष्मी सहकारीको रकम अपचलनको आरोप लागेका लामिछाने र छविलाल र कुमार रम्तेल सहित ५ जना थुनामा छन् । काठमाडौँ महानगरपालिका–६ घर भएका कमल लामा र काठमाडौँ महानगरपालिका–३१ घर भएकी सुनिता नेवा जिल्ला प्रहरी परिसर काठमाडौँको हिरासतमा छन् ।
स्वर्णलक्ष्मी बहुउद्देश्यीय सहकारी संस्थाका अध्यक्ष जीवी राई हुन् । रकम अपचलनबारे अनुसन्धान गर्न ६४५ जना बचतकर्ताले प्रहरीमा जाहेरी दिएका छन् । स्वर्णलक्ष्मीबाट १ अर्ब ११ करोड निक्षेप अपचलन भएको प्रहरीको प्रारम्भिक अनुसन्धान निष्कर्ष छ ।
२७ हजार निक्षेपकर्ताले सो सहकारीमा २ अर्ब ६५ करोड ९५ लाख जम्मा गरेको सहकारीको रेकर्डमा भेटिएको छ । काठमाडौंमा रविको बयान सकिएपछि उनलाई कास्की लगिने छ र थप बयानका लागि चितवन लैजाने प्रहरीको तयारी छ ।
चितवनमा पनि रवि र छविलाई पक्राउ पुर्जी जारी भइसकेको छ । अहिले पोखरा, बुटबलमा उनको बयान सकिएको छ । आफ्ना सभापतिमाथि अनुशन्धान छिटो सकाएर अदालती प्रक्रिया सुरु गर्न रास्वपाले प्रधानमन्त्री केपी शर्मा ओलीलाई नै भेटेर आग्रह गरेको छ ।
जसमा अनुशन्धान र अदालती प्रक्रिया आफ्नै ढंगले अगाडि बढ्ने भएकाले त्यसमा आफूले हस्तक्षेप नगर्ने प्रधानमन्त्रीले जवाफ फर्काएका छन् । तर रास्वपाले भने रविलाई हिरासतमै राखेर गरिएको अनुसन्धानलाई राजनीतिक हस्तक्षेप भनेको छ ।
सहकारीकै वचत अपचलनमा जोडिएका काग्रेसका धनराज गुरुङलाई सीआईबीले कागज गराएर छाडेको छ भने एमाले सांसद ऋषिकेश पोखरेलकी पत्नीका सम्बन्धमा सोधपुछ समेत गरिएको छैन् ।
