३० माघ, काठमाण्डौ ।
काठमाडौंको बबरमहलमा मेलम्चीको पानीको पाइप फुटेर जलमग्न भएको छ । सडकमा रहेको पाइप फुटेर जिल्ला अदालत काठमाडौं, विशेष अदालत जलमग्न भएको छ । अदालतको पहिलो तला नै डुबाएको छ ।साथै वन परिसर डुबानमा परेको छ ।
डुबानको कारण अदालतको सेवा प्रभावित भएको छ । पानी पसेपछि सुनुवाइ नै स्थगित भएको विशेष अदालतका उपरजिष्ट्रार गेहेन्द्रराज रेग्मीले जानकारी दिएका छन् । उनका अनुसार पानी पसेपछि बाहिर निस्किन सक्ने अवस्था थिएन ।
‘साढे दुई बजेपछि अदालत परिसरमा पानी पस्यो। केहीबेरमा अदालतभित्रै पनि पानी पस्यो,’ रेग्मीले भनेका छन्, ‘फाँटमा पनि पानी पसेपछि सुनुवाइहरू स्थगित गर्नुप¥यो।’ पानी पसेपछि अदालतमा न्यायाधीशहरू पनि त्यहीँ फसेका थिए ।
पाइप फुटेर सडकसमेत जलमग्न हुँदा सवारी आवागमन प्रभावित भएको छ । एक लेन पुरै बन्द भएको छ भने अर्को लेनमा सवारी जाम भएको छ । जलमग्न भएपछि सशस्त्र प्रहरी र महानगर नगरप्रहरीको टोलीले डुवानमा परेकाको उद्धार गरेको छ।
पाइप फुटेपछि डुबान भएको स्थानमा सडक भासिएको छ। मेलम्ची खानेपानी आयोजनाको पानीको पाइप फुटेर लथालिंग बन्दा डुबानमा परेको सडक भासिएको हो । सडक भासिएपछि उक्त क्षेत्रमा सवारी साधन आवतजावतमा रोक लगाइएको छ।
मेलम्ची खानेपानी परियोजना कार्यान्वयन इकाईका प्रमुख टीका चौधरीले नेपाल विद्युत् प्राधिकरणले बिजुलीको तार भूमिगत गर्ने क्रममा मेलम्चीको पाइप फुटेको बताएका छन् । प्रमुख चौधरीले भने, ’प्राधिकरणले तार भूमिगत गर्ने क्रममा ड्रिलिङ गर्दा हाम्रो पाइप फुटेको हो। हामीले अब त्यस क्षेत्रमा पानी बन्द गर्दैछौँ।’ उनले भनेका छन्, ’प्राधिकरणले तार बिछ्याउने क्रममा पाइप फुटेको हो। अब प्राधिकरणले त्यो बनाउँछ। जसले बिगारेको हो त्यसैले बनाउने हो।’
यसअघि पनि मेलम्ची खानेपानी वितरणका लागि काठमाडौं उपत्यकामा बिछ्याइएका पाइपमा पटक पटक चुहावट हुने गरेको थियो । काठमाडौं उपत्यका खानेपानी लिमिटेड आयोजना कार्यान्वयन निर्देशनालयले एसियाली विकास बैंकको ऋण सहयोगमा सन् २०१३ देखि चक्रपथभित्र १ हजार १० किमी पाइप बिच्छाएको थियो ।
नयाँ पाइपमा पनि अरू निकायले काम गर्दा क्षति पुगेकाले चुहावट हुन थालेको थियो । ढल तथा सडक बनाउँदा, विद्युत् अन्डरग्राउन्ड गर्दा पाइपमा क्षति पुगिरहेकाले पनि सडकमा धेरै ठाउँमा चुहावट हुने गरेको छ ।
उपत्यकामा झन्डै सय वर्ष पुरानो पाइप रहेकाले पनि पुराना पाइपमा बढी समस्या हुने गरेको छ । यसअघि कम परिमाणमा पानी वितरण हुने गरेकामा मेलम्चीको पानी दैनिक १७ करोड लिटर आउँदा पनि पूराना पाइपमा समस्या आएका थिए ।
