२७ असोज , काठमाण्डौ ।
टी– २० विश्वकप एसिया तथा इस्ट एसिया प्यासिफिक छनोटअन्तर्गत सुपर सिक्सको दोस्रो खेलमा नेपाल आज कतारसँग खेल्दै छ । यो खेल नेपाली समयअनुसार राति ८ः४५ बजे ओमानमा हुनेछ ।
नेपालले सुपर सिक्सको पहिलो खेलमा यूएईविरुद्ध १ रनको रोमाञ्चक जित निकालेको थियो । कतार भने हिजो ओमानसँग ३४ रनले पराजित भएको थियो । नेपाल जारी प्रतियोगिताको अपराजित टोली हो ।
साथै, आज ओमान र युएई पनि प्रतिस्पर्धा गर्दै छन् । यो खेल नेपाली समयअनुसार दिउँसो ४ः१५ बजे हुँदै छ । सुपर सिक्सको खेलपछि शीर्ष तीन टोली आगामी वर्ष भारत र कतारमा हुने टी– २० विश्वकपका लागि छनोट हुनेछन् ।
सुपर सिक्समा नेपाल, यूएई, ओमान, कतार, सामोआ र जापानबीच प्रतिस्पर्धा जारी छ । हिजोको खेलमा नेपालले दिएको १४१ रनको लक्ष्य पछ्याएको यूएईले २० ओभरमा नौ विकेट गुमाएर १३९ रन मात्र बनाउन सक्यो ।
यूएईलाई अन्तिम तीन बलमा तीन रन चाहिएको अवस्थामा तीन विकेट गुमाएर एक रन मात्र जोड्न सक्यो । यूएईलाई हराएसँगै नेपाल विश्वकप नजिक पुगेको छ । नेपाल दुई खेलमा चार अङ्कसहित तालिकाको दोस्रो स्थानमा छ ।
दुई खेलमा चार अङ्क नै भएको ओमान नेट रन रेटका आधारमा शीर्ष स्थानमा छ । यूएई दुई खेलमा दुई अङ्कसहित तेस्रो स्थानमा छ । सुपर–६ मा समूह ‘ए’ बाट यूएई र कतार, समूह ‘बी’ बाट नेपाल र जापान तथा समूह ‘सी’ बाट ओमान र सामोआ पुगेका छन् ।
नेपाल र कतार यसअघि ३ पटक आमनेसामने भएका छन् । यसमध्ये २ खेल नेपालले र एक खेल कतारले जितेको छ । पछिल्लो पटक नेपालले कतारलाई गत अप्रिलमा ८ विकेटले हराएको थियो ।
त्यसअघि सन २०२४ को अप्रिलमा नेपाल ३२ रहने विजयी भएको थियो । कतारले सन २०१९ को जुलाईमा नेपाललाई ४ विकेटले पराजित गरेको थियो । अब आज कतारको सामना गर्दा पक्कै पनि नेपाली क्रिकेटप्रेमीलाई सो वर्षको सम्झना आउने छ ।
किनभने त्यो बेला नेपाली क्रिकेट टोली आफ्नो अन्तर्राष्ट्रिय यात्रामा सबैभन्दा अनेपेक्षित हार ब्यहोरेको थियो । सोबेला यी दुवै टोली पहिलो पटक आमने सामने भएका थिए ।
नेपालले प्रस्तुत गरेको १२३ रनको लक्ष्य कतारले चार बल बाँकी रहँदा ६ विकेट गुमाउँदै पूरा गरेको थियो । त्यसयता यी दुईबीच भएका दुई खेल भने नेपालले आफ्नो पक्षमा पारेको छ ।
अब आज पनि ओमानको अल अमिरतस्थित ओमान क्रिकेट एकेडेमी टर्फ–१ मा उच्च लयमा रहेको नेपाल संघर्षरत कतारसँग सजक भने रहनेछ । टोलीले प्रतिपक्षलाई कमजोर आँक्ने गल्ती गर्नेछैन ।
रोहितकुमार पौडेलेको कप्तानीमा रहेको नेपाल सुपर सिक्समा लगतार दोस्रो जितसँगै विश्वकपमा पुग्ने सम्भावनालाई अझै बलियो बनाउ चहान्छ । यता मिर्जा मोहम्मद बेगको कप्तानीमा कतारले तीन खेलमा दुई हार र एक जितको नतिजा निकालेको छ ।
समूह चरणमा युएईसँग सात विकेटको हार बेहोरेको कतारले मलेसियालाई आठ विकेटले हराएको थियो । यसैगरी टोली सुपर सिक्सको पहिलो खेलमा घरेलु टोली ओमानसँग ३४ रनले पराजित भएको थियो ।
कतार नेपालविरुद्ध जित निकाल्दै विश्वकमा छनोट हुने सम्भावनालाई जिवितै राख्ने सोचमा छ । नेपालले पर्सि बुधवार ओमान र आउँदो शुक्रवार सामोआसँग खेल्नेछ ।
